Прэзыдэнт Манголіі праз абвінавачаньні ў карупцыі пайшоў у адстаўку. Раней ён атрымаў ад Лукашэнкі два трактары

Прэзыдэнт Манголіі Ухнаагійн Хурэлсух, архіўнае фота

Прэзыдэнт Манголіі Ухнаагійн Хурэлсух заявіў аб адстаўцы пасьля таго, як апазыцыйная партыя абвінаваціла яго ў атрыманьні фінансавай выгады ад урадавага чыгуначнага праекту і запатрабавала ягонай адстаўкі.

Як паведаміла агенцтва AP, ён паабяцаў супрацоўнічаць зь сьледзтвам.

Ухнаагійн Хурэлсух заняў пасаду прэзыдэнта ў 2021 годзе на хвалі перамогі Мангольскай народнай партыі (былая МНРП, кіроўная партыя краіны ў часы камунізму), якая тады атрымала большасьць у заканадаўчым органе. Прэм’ер-міністар Манголіі таксама сябра гэтай партыі.

Аднак апошнімі гадамі ў партыі назіраюцца канфлікты; толькі за дзевяць месяцаў у краіне зьмяніліся тры кіраўнікі ўраду. Цяпер рашэньне аб адстаўцы Ухнаагійна Хурэлсуха мусіць ухваліць парлямэнт — Дзяржаўны вялікі хурал.

ГЛЯДЗІЦЕ ТАКСАМА:

Яшчэ адна краіна заявіла аб паліўным крызісе праз украінскія атакі на Расею. Манголія просіць дапамогі ў Менску

Сувязь зь Беларусьсю

Прэзыдэнт Манголіі Ухнаагійн Хурэлсух наведваў Беларусь зь візытам сёлета 24–26 кастрычніка. Гэта быў візыт у адказ пасьля наведваньня Аляксандрам Лукашэнкам Улан-Батару ў 2024 годзе. Тады мангольскі кіраўнік падарыў Лукашэнку двух мангольскіх скакуноў-жарабцоў, якіх назвалі Мір і Хуткі, а Лукашэнка яму — два трактары «Беларус» розных мадэляў.

Колішні прэзыдэнт і экс-прэм’ер Манголіі Цахіягійн Элбэгдорж заклікаў арыштаваць Лукашэнку па прылёце ва Ўлан-Батар, а грамадзкі рух «Не — вайне» зладзіў акцыю пратэсту супраць візыту Аляксандра Лукашэнкі ў краіну. Актывісты выйшлі на плошчу Сухэ-Батара ў сталіцы Манголіі, дзе іх затрымала паліцыя, паведамляў тады мангольскі сайт news.mn. Кіраўніка руху, які назваў Лукашэнку ваенным злачынцам паводле міжнароднага крымінальнага права, пратрымалі ў пастарунку 2,5 гадзіны і адпусьцілі.

ГЛЯДЗІЦЕ ТАКСАМА:

Лукашэнка выпрабаваў пераможную зброю Чынгісхана і атрымаў у падарунак двух мангольскіх скакуноў-жарабцоў

Падчас сёлетняга візыту Ухнаагійна Хурэлсуха ў Менск бакі абмяркоўвалі супольныя праекты ў прамысловасьці і сельскай гаспадарцы, а таксама падрыхтавалі дарожную мапу супрацы на 2027–2029 гады. Паралельна ў беларускай сталіцы прайшлі Дні культуры Манголіі і двухбаковы бізнэс-форум.

ГЛЯДЗІЦЕ ТАКСАМА:

Ліст палітвязьняў: ці ісьці на саступкі Лукашэнку? Тыдзень з Карбалевічам