«Нічога пра беларусаў без беларусаў»: Латушка прапанаваў прызначыць спэцпасланьніка ЭЗ па Беларусі

Павал Латушка

Беларускія дэмакратычныя сілы павінны ўдзельнічаць у міжнародных перамовах пра будучыню Беларусі, а Эўразьвязу варта прызначыць адмысловага пасланьніка па беларускім пытаньні. Пра гэта заявіў намесьнік кіраўніцы Аб’яднанага пераходнага кабінэту Павал Латушка на эканамічным кангрэсе ў Познані.

Падчас дыскусіі «Стратэгія Польшчы і ЭЗ у дачыненьні да Беларусі» ён нагадаў, што спробы дамовіцца з Аляксандрам Лукашэнкам не прывялі да істотных зьменаў.

«Дамовіцца з Лукашэнкам спрабавалі ўжо пяць разоў. Гэта не прывяло да стратэгічных зьмен», — адзначыў Павал Латушка.

Чаму патрэбны спэцпасланьнік ЭЗ

Латушка прапанаваў прызначыць адмысловага пасланьніка Эўразьвязу па Беларусі з моцным мандатам, заснаваным на рашэньнях ЭЗ. Паводле яго, такі прадстаўнік мог бы дапамагчы забясьпечыць удзел беларускіх дэмакратычных сілаў у міжнародных перамовах пра Беларусь.

«Нам патрэбны моцны голас нашых партнэраў», — падкрэсьліў Латушка, згадаўшы ЭЗ, Польшчу, Вялікую Брытанію, Украіну і ЗША.

Ён таксама паведаміў, што дэмакратычныя сілы распрацавалі дзесяць умоваў, якія, паводле іх прапановы, павінен выканаць Лукашэнка, калі хоча ўдзельнічаць у перамовах.

«Нічога пра беларусаў без беларусаў»

Асобна Латушка заявіў, што Лукашэнка ня можа гарантаваць бясьпеку рэгіёну, бо Беларусь зьвязаная ваеннымі абавязаньнямі з Расеяй.

Палітык таксама выступіў супраць таго, каб Лукашэнка прадстаўляў інтарэсы беларускага народу на міжнародных перамовах.

«Нічога пра беларусаў без беларусаў», — сфармуляваў ён пазыцыю дэмакратычных сілаў.

На думку Латушкі, будучыню краіны павінен вызначаць беларускі народ, а ягоныя інтарэсы на міжнародным узроўні мусяць прадстаўляць дэмакратычныя сілы пры падтрымцы партнэраў.

У дыскусіі таксама ўзялі ўдзел намесьнік дырэктара Цэнтру ўсходнеэўрапейскіх дасьледаваньняў Адам Эбэрхарт і старэйшы экспэрт аддзелу Беларусі, Украіны і Малдовы Цэнтра ўсходніх дасьледаваньняў Каміль Клысінскі.