Праца віленскага аэрапорту была парушаная другі раз за вечар.
З 21:21 да 22:26 мясцовага часу абмежаваньні паветранай прасторы над віленскім аэрапортам уводзілі з прычыны навігацыйных адзнак на радарах, характэрных для паветраных шароў, перадае LRT. У паведамленьні гэта было названа гібрыднай атакай, якую Беларусь вядзе супраць Літвы, цывільнай авіяцыі і грамадзтва.
А 21:47 увялі абмежаваньні і над ковенскім аэрапортам.
У паветра падымаліся зьнішчальнікі.
А 23:50 мясцовага часу на Віленшчыне стан небясьпекі адмянілі.
Увечары 10 лістапада Мытня Літвы паведаміла пра выяўленьне ў інфраструктуры інфармацыйных сыстэмаў прыкметаў магчымай незаконнай дзейнасьці. Пра інцыдэнт праінфармавалі Нацыянальны цэнтар кібэрнэтычнай бясьпекі і Дзяржаўнае агенцтва лічбавых рашэньняў.
Небясьпеку аб’явілі і ў Латвіі
У Лудзэнскім краі Латвіі аб’явілі паветраную небясьпеку з 23:25. Прыведзеныя ў дзеяньне падразьдзяленьні дронаў-перахопнікаў і супрацьпаветранай абароны. Край мяжуе зь Верхнядзьвінскім раёнам Беларусі і Себескай муніцыпальнай акругай Расеі.
ГЛЯДЗІЦЕ ТАКСАМА:
Эўракамісія адмовілася аплаціць супрацьдронавыя сыстэмы краінам БалтыіЧаму гэта важна
Некантраляваныя мэтэазонды падымаюцца на вышыню, на якой рухаюцца самалёты цывільнай авіяцыі, што ўплывае на бясьпеку палётаў і наносіць страты аэрапорту і авіякампаніям. Літоўскія авіяцыйныя ўлады лічаць, што зонды зь Беларусі спэцыяльна запускаюць у зоны, небясьпечныя для авіяцыі.
Дроны, якія сотнямі штодня выкарыстоўваюць войскі Расеі і Ўкраіны, часам адхіляюцца ад курсу і залятаюць у суседнія краіны. У Беларусі пра залёты вайсковых дронаў у рэжыме рэальнага часу не паведамляюць і трывогі не аб’яўляюць.