Віктар Хрэнін 10 лістапада знаходзіцца ў Маскве і ў кулюарах супольнага пасяджэньня Савета міністраў замежных спраў, Савета міністраў абароны і Камітэту сакратароў бясьпекі краін АДКБ.
Сярод іншага Хрэнін расказаў журналістам, чаму ў Беларусі надаюць вялікую ўвагу разьвіцьцю сродкаў супрацьдзеяньня дронам.
«Мы актыўна адсочваем сытуацыю. І бачым, як імкліва зьмяняюцца формы і спосабы вядзеньня баявых дзеяньняў. На сёньняшні дзень, калі гаварыць мовай лічбаў, ужо больш за 70 %, а то і 80 % ступень агнявога паражэньня занялі бесьпілётныя лятальныя апараты», — цытуе Віктара Хрэніна беларускае дзяржаўнае агенцтва БелТА.
ГЛЯДЗІЦЕ ТАКСАМА:
У Менску заявілі, што распрацавалі перадатчык перашкод для прыкрыцьця інфраструктуры падчас вайсковай пагрозыШто папярэднічала і чаму гэта важна
Беларусь падтрымлівае расейскую агрэсію супраць Украіны ад пачатку ваеннага ўварваньня ў лютым 2022 году.
Апошнім часам, калі Расея і Ўкраіна істотна павялічылі выкарыстаньне дронаў, яны пэрыядычна залятаюць на тэрыторыю Беларусі.
З іншага боку, Ўкраіна некалькі разоў публічна абвінаваціла Беларусь у тым, што на яе мяжы з Украінай ёсьць абсталяваньне, якое расейцы выкарыстоўваюць для карэкцыі атак на Ўкраіну.
Апошнія некалькі гадоў на ўсіх вайсковых вучэньнях пачалі адпрацоўваць працу супрацьпаветранай абароны менавіта з пункту гледжаньня барацьбы з дронамі.
Дзяржаўны вайскова-прамысловы камітэт Беларусі пэрыядычна паведамляе аб новых распрацоўках, якія дазваляюць супрацьдзейнічаць бесьпілётнікам.
У чэрвені 2025 году ў Генэральным штабе Ўзброеных сіл Беларусі афіцыйна абвясьцілі аб стварэньні ў структуры арміі войскаў бесьпілётных авіяцыйных комплексаў.