«Пакуль Расея і Беларусь падтрымліваюць гэтую незаконную, неапраўданую і жахлівую вайну ва Ўкраіне — пакуль гэта працягваецца, — ніводны спартоўца з гэтых краін ня будзе выступаць у Канадзе», — працытавала Марка Карні агенцтва Reuters.
«Таму, калі вы пытаецеся канкрэтна пра моладзевы чэмпіянат сьвету, то расейцаў там ня будзе», — заявіў канадзкі прэм’ер падчас тэлевізійнай прэсавай канфэрэнцыі па выніках саміту ў Антыгуа.
ГЛЯДЗІЦЕ ТАКСАМА:
Швэцыя разглядае магчымасьць візавых абмежаваньняў для расейскіх і беларускіх спартоўцаўШто папярэднічала
Спартовы арбітражны суд на мінулым тыдні дазволіў расейцам удзельнічаць у спаборніцтвах, што праводзяцца пад эгідай Міжнароднай фэдэрацыі хакею.
Канада, якая зьяўляецца адным з асноўных міжнародных хаўрусьнікаў Украіны ў вайне супраць Расеі, асудзіла гэтае рашэньне.
Трэцяга лістапада нацыянальныя фэдэрацыі хакею Нарвэгіі, Даніі, Швэцыі і Чэхіі заявілі, што адмовяцца гуляць супраць Расеі на мужчынскім чэмпіянаце сьвету па хакеі, які ў наступным годзе будзе праходзіць у Нямеччыне.
Моладзевы чэмпіянат сьвету ў Канадзе адбудзецца сёлета з канца сьнежня да пачатку студзеня.
ГЛЯДЗІЦЕ ТАКСАМА:
Польскія памежнікі адправілі дадому каманду беларускіх каратыстаў за нямэтавае выкарыстаньне візаўЧаму гэта важна
Сёлета ў ліпені Міжнародная фэдэрацыя хакею (IIHF) ухваліла рашэньне і надалей не дапускаць зборныя Беларусі і Расеі да ўдзелу ў турнірах, у тым ліку ў мужчынскім чэмпіянаце сьвету 2027 году і моладзевым чэмпіянаце сьвету 2027 году.
Расея гэтае рашэньне пасьпяхова абскардзіла ў арбітражы.
Для Беларусі гэтае абмежаваньне пакуль дзейнічае і яно азначае, што беларуская зборная ня будзе ўдзельнічаць у падзеях IIHF у сэзоне 2026–2027 гадоў, у тым ліку ў чэмпіянаце сьвету сярод мужчын, чэмпіянаце сьвету сярод юніёраў і чэмпіянаце сьвету сярод мужчын і жанчын да 18 гадоў.
Беларусь таксама засталася за бортам хакейных турніраў, хоць IIHF раней выказвалася аб плянах рэінтэграваць краіну ў некаторыя спаборніцтвы ніжэйшага ўзроўню, у тым ліку ў спаборніцтвы сярод мужчын і жанчын да 18 гадоў і чэмпіянат сьвету сярод жанчын у IV дывізіёне.