Фэдэральная служба бясьпекі Расеі затрымала ў Маскве непаўналетняга, якога падазраюць у падрыхтоўцы тэракту ў маскоўскім музэі-запаведніку «Царыцына».
Як распавялі ў Цэнтры грамадзкіх сувязяў ФСБ, падлетак разьмясьціў у TikTok свае фатаграфіі ў тактычным адзеньні, балаклаве, кепцы, акулярах, навушніках, з прадметам, падобным да аўтаматычнай зброі, а таксама фатаграфіі, зробленыя ў «Царыцына». У ягоным тэлефоне знайшлі падпіску на нэанацысцкі канал і запыты аб учыненых тэрактах.
ФСБ падзякавала амэрыканскім калегам за своечасова перададзеную інфармацыю.
31 кастрычніка пасольства ЗША ў Маскве апублікавала на сваёй старонцы папярэджаньне аб пагрозе тэракту ў «Царыцына». Пазьней аналягічнае папярэджаньне апублікавала і пасольства Нямеччыны.
Увечары 31 кастрычніка музэй-запаведнік быў зачынены і ачэплены паліцыяй і спэцслужбамі, наведнікаў эвакуавалі.