«На сёньня мне сабралі больш за 2200 эўра. Падлічыў, што гэтага будзе дастаткова на пару месяцаў арэнды новага жыльля і на ежу. Але я не адзіны, хто мае патрэбу ў такой дапамозе праз сайт BySol, там мусіць быць ратацыя. Мне ж дастаткова, далей спадзяюся на ўласны бізнэс, таму напісаў заяву аб спыненьні збору. А ўсім, хто мне дапамог сваімі сродкамі, вельмі ўдзячны. Убачыў пэўную падтрымку ад беларусаў, яна сапраўды ўзрушвае», — сказаў Дзьмітый Кучук.
Дзьмітрый Кучук ужо год як жыве ў Вільні. Сёлета ён распачаў уласны бізнэс: ягоная фірма Waste Line занялася зборам старой бытавой тэхнікі і сьмецьця, каб здаваць на ўтылізацыю. Але працаваць на літоўскім рынку збору адкідаў аказалася няпроста, Кучук сутыкнуўся зь фінансавымі цяжкасьцямі.
«У мяне не было пачатковага капіталу, а выдаткі наваліліся вялікія. На тую ж арэнду транспарту, безь якога немагчымы збор адкідаў, ішла значная частка заробленых грошай, а яшчэ трэба плаціць падаткі. Праз гэта ў канцы верасьня мусіў зьехаць з былой кватэры ў прытулак», — тлумачыў Дзьмітры Кучук, чаму BySol абвясьціў для яго збор фінансавай дапамогі.
З таго часу Дзьмітры змог вырашыць адну з найважнейшых для бізнэсу праблемаў — ён знайшоў сродкі і купіў мікрааўтобус, які ўжо выкарыстоўвае для збору адкідаў.
«Прыйшоў на дапамогу адзін польскі бізнэсовец: даў у крэдыт на год грошы, і бус цяпер мой. Гэта дапаможа скараціць выдаткі. Бус ужо ў працы», — паведаміў Дзьмітры Кучук.
Паводле Кучука, яму таксама дапамаглі аднадумцы зь беларускай партыі «Зялёныя», а яшчэ ахвяраваньні яму пералічылі экалягічныя актывісты сумеснага з швэдзкімі «зялёнымі» экалягічнага праекту «Паглыблены дыялёг», якія працуюць у Вільні.
«Узрушвае такая падтрымка, прычым ня толькі грашовая, але і маральная: мне званілі і пісалі словы салідарнасьці вельмі шмат людзей, нават з Амэрыкі былі лісты», — кажа Дзьмітрый Кучук.
30 кастрычніка ў Кучука заканчваецца тэрмін дамовы аб жыхарстве ў шэлтэры «Краіна для жыцьця», куды ён перабраўся, каб эканоміць. Былы палітзьняволены кажа, што ўжо вызначыўся з новым жытлом і неўзабаве туды пераедзе.
ГЛЯДЗІЦЕ ТАКСАМА:
У Варшаве прэзэнтавалі кнігу «Архіпэляг Беларусь» зь сьведчаньнямі былых палітвязьняўУвогуле пра месяц, праведзены ў прытулку, Дзьмітрый Кукук адгукаецца зь вялікай удзячнасьцю. Паводле былога палітвязьня, удалося ня толькі эканоміць грошы, але і абзавесьціся карыснымі знаёмствамі.
«Там добрая атмасфэра. А наш беларус, у якога была СТА ў Менску, дапамог з выбарам буса і ацэнкай ягонага стану. Цяпер заключаем з гэтым чалавекам дамову на далейшае тэхнічнае абслугоўваньне машыны», — паведаміў Дзьмітры Кучук.
Паводле былога палітвязьня, беларуская салідарнасьць, якую ён адчуў, калі сутыкнуўся з жыцьцёвымі цяжкасьцямі, дапамагае таксама захоўваць душэўную раўнавагу і аптымістычны настрой.
«У эміграцыі вельмі важна адчуваць сябе карысным, патрэбным людзям. Зьяўляюцца сілы ня толькі для працы, але і для грамадзкай актыўнасьці», — тлумачыць лідэр зьліквідаванай уладамі Беларусі партыі «Зялёныя», якая і ў эміграцыі працягвае дзейнасьць.
Перасьлед Дзьмітрыя Кучука
Дзьмітры Кучук быў затрыманы ў Менску 16 лютага 2024 году, пасьля таго, як публічна спрабаваў ушанаваць памяць памерлага ў вязьніцы расейскага апазыцыянэра Аляксея Навальнага.
У сьнежні таго ж году Кучука асудзілі на 6 гадоў зьняволеньня паводле двух артыкулаў Крымінальнага кодэксу, уключна з артыкулам 342 — пра ўдзел у «дзеяньнях, якія груба парушаюць грамадзкі парадак».
Актывіст адбываў пакараньне ў папраўчай калёніі № 9 у Горках, адкуль быў вызвалены 11 верасьня 2025 году і разам зь яшчэ 50 былымі палітвязьнямі прымусова вывезены ў Літву.