Дата дня
25 кастрычніка 1936 году нарадзіўся Віктар Тураў, беларускі кінарэжысэр. Сярод прац Турава — экранізацыя раманаў Івана Мележа «Людзі на балоце» і «Подых навальніцы», фільм «Шляхціц Завальня» паводле творчасьці Яна Баршчэўскага.
ГЛЯДЗІЦЕ ТАКСАМА:
20 нечаканых фактаў пра Віктара ТураваГэты дзень у гісторыі
1920 — войска генэрала Станіслава Булак-Балаховіча (15 тыс.) перайшло часовую мяжу, пачаўшы ваенныя дзеяньні супраць Чырвонай Арміі.
Станіслаў Булак-Балаховіч
1968 ― першы выступ брытанскага рок-гурту Led Zeppelin.
Брытанскі гурт Led Zeppelin
2010 — у Пінску на заводзе «Пінскдрэў» адбыўся выбух і пажар, які забраў жыцьці 14 чалавек.
2020 — напярэдадні абвешчанага Сьвятланай Ціханоўскай усеагульнага страйку ў Менску і іншых гарадах краіны адбыўся «Марш народнага ўльтыматуму». У Менску марш сабраў звыш 100 тысяч удзельнікаў і завяршыўся жорсткім разгонам.
«Марш народнага ўльтыматуму», Менск, 25 кастрычніка 2020
У гэты дзень нарадзіліся
1825 — Ёган Штраўс-сын, аўстрыйскі кампазытар, «кароль вальсу».
1838 — Жорж Бізэ, францускі кампазытар, аўтар опэры «Кармэн».
Жорж Бізэ
1858 — Эдвард Пякарскі, этнограф, якутазнаўца. Быў сасланы ў Якуцію за рэвалюцыйную дзейнасьць і правёў там больш за дваццаць гадоў. Склаў шматтомны слоўнік якуцкай мовы. У Якуцку ягоным імем названая вуліца. З 2001 імя Пякарскага было ўшанавана памятнай шыльдай на помніку палітычным ссыльным і ахвярам масавых рэпрэсій, аднак помнік зруйнавалі ў 2023 годзе.
1868 — Карл Грыгаровіч, скрыпач, прафэсар народнае кансэрваторыі ў Віцебску. У 1921 годзе яго арыштавалі за кантакты з польскай дэлегацыяй і асудзілі на тры гады прымусовых работ. 25 сакавіка таго ж году ён памёр.
1872 — Аляксандар Разэнфэльд, фальклярыст і этнограф У 1904 годзе выдаў зборнік «Беларускія народныя песьні». У 1912–1914 гадах кіраваў у Пецярбурскім унівэрсытэце Беларускім навукова-літаратурным гуртком студэнтаў, старастам якога быў Браніслаў Тарашкевіч.
1881 — Пабла Пікаса, гішпанскі мастак.
Пабла Пікаса
1884 — Сяргей Дубінскі, археоляг і гісторык. Падрыхтаваў першую «Бібліяграфію па археалёгіі Беларусі і сумежных краін». Ахвяра сталінізму.
1925 — Леў Мірачыцкі, беларускі гісторык-славіст, літаратар.
1930 — Леанід Дударэнка, беларускі жывапісец, заслужаны дзеяч мастацтваў Беларусі.
1932 — Уладзімер Анісковіч, літаратурны крытык, перакладнік баўгарскай літаратуры.
1933 — Нінэль Шчасная, беларуская мастачка.
Нінэль Шчасная. Фота газэты «Культура»
1934 — Карлас Шэрман, беларускі перакладчык і літаратар уругвайскага паходжаньня. Ён перакладаў і пісаў на гішпанскай (роднай), беларускай і расейскай мовах. Быў першым віцэ-прэзыдэнтам Беларускага ПЭН-цэнтру (1989–2001 гг.), стаўшы фактычна адным зь яго заснавальнікаў. Быў сябрам навукова-экспэртнай Рады Беларускага Калегіюму.
Тацяна Процька, Карлас Шэрман, Уладзімер Кармілкін на пасяджэньні Беларускага Хэльсынскага камітэту, 1995 год
1935 — Уладзімер Паўлаў, беларускі пісьменьнік і перакладчык, ляўрэат Літаратурнай прэміі імя Івана Мележа.
1955 — Яўген Анішчанка, беларускі гісторык. У 2004 годзе абараніў доктарскую дысэртацыю на тэму «Палітычная гісторыя Беларусі ў часы падзелу Рэчы Паспалітай». Аднак Вышэйшая атэстацыйная камісія не зацьвердзіла гэтае абароны, матывуючы тым, што высновы ягонай навуковае працы палітычна непрымальныя. У 2006 годзе Анішчанка выдаў тэкст дысэртацыі асобнай кнігай.
1956 — Сяргей Малішэўскі, беларускі мастак.
Сяргей Малішэўскі, карціна «У прыбіральні». Выстава ў Нацыянальным цэнтры сучаснага мастацтва, 2017 год
У памяці
1647 — Эванджэліста Тарычэлі, італьянскі фізык і матэматык, які першы зьмерыў атмасфэрны ціск.
1920 — у брытанскай турме пасьля 74 дзён галадоўкі памёр Тэрэнс Максуіні, мэр ірляндзкага гораду Корк і адзін з кіраўнікоў руху за незалежнасьць Ірляндыі. Неўзабаве Ірляндыя стала незалежнай. Помнік Максуіні цяпер стаіць перад ратушай Корку.
1942 — Хвядос Шынклер, пісьменьнік, пачынальнік урбаністычнай тэмы ў беларускай літаратуры, загінуў на фронце пад Сталінградам.
1991 —Міхась Міцкевіч, беларускі грамадзка-культурны, рэлігійны і сьвецкі дзеяч эміграцыі, малодшы брат Якуба Коласа.
Міхась Міцкевіч. Фрагмэнт экспазыцыі да ягонага 130-годзьдзя (2017).
1995 — Лявон Случанін, беларускі паэт.
2015 — Мікалай Барысевіч, прэзыдэнт Акадэміі навук БССР у 1969–1987 гадах.