Як паведамілі ў прэс-службе МУС Беларусі, міліцыя атрымала інфармацыю аб тым, што 65-гадовы жыхар вёскі Старая Рудня Астравецкага раёну захоўвае незарэгістраваную паляўнічую стрэльбу і пагражае ёю суседзям.
На месца выехалі міліцыянты разам з байцамі атраду спэцназу «Цыклон» Унутраных войскаў.
«Убачыўшы праваахоўнікаў, агрэсіўна настроены мужчына аказаў узброены супраціў і зрабіў стрэл у супрацоўнікаў, ствараючы рэальную пагрозу жыцьцю і здароўю навакольных. Супрацьпраўныя дзеяньні былі апэратыўна спыненыя вайскоўцамі спэцпадразьдзелу: ужывалася зброя на паражэньне, зламысьнік абясшкоджаны», — гаворыцца ў паведамленьні МУС.
Таксама сілавікі паведамілі, што правялі агляд хаты мужчыны і знайшлі самаробную зброю.
Які цяпер стан мужчыны, сілавікі не ўдакладняюць.
У роліку дэманструюць бронекамізэльку, на якой міліцыянт паказвае дзірку, падобную на сьлед ад кулі.