Як паведамляе Hoster.by, буйны беларускі правайдэр і рэгістратар дамэнных імёнаў, у мове PHP выяўленыя дзьве крытычныя ўразьлівасьці, якія могуць дазволіць зламысьнікам выканаць шкодны код на вэб-сэрвэры. Уразьлівасьці выявілі самі распрацоўнікі.
Вонкавы трафік Беларусі адключаны «у адпаведнасьці з распараджэньнем упаўнаважанага дзяржаўнага органа, які ажыцьцяўляе ў Рэспубліцы Беларусь каардынацыю дзейнасьці ў сфэры кібэрбясьпекі з мэтай перадухіленьня і мінімізацыі наступстваў кібэратак, зьвязаных з эксплюатацыяй крытычных уразьлівасьцяў PHP», піша Hoster.by.
Hoster.by сьцвярджае, што працаздольнасьць вэб-рэсурсаў Беларусі захаваецца, але яны ня будуць даступныя зь іншых сэгмэнтаў інтэрнэту (іншых краін). Пры гэтым трафік з давераных сетак буйных пошукавых ботаў (Яндэкс, Google і інш.) будзе захаваны.
З-за мяжы не адкрываліся сайты БелТА, Pravo.by, сайт Белстату і некаторыя іншыя.
Пасьля 10 гадзін раніцы 22 кастрычніка блякаваньне зьнялі.
Распрацоўнікі PHP абвясьцілі аб выпуску тэрміновых абнаўленьняў бясьпекі, паведамляе Hoster.
Чаму гэта важна
Шчыліны ў праграмным забесьпячэньні даюць зламысьнікам магчымасьць атрымаць правы адміністратара на сэрвэры, красьці канфідэнцыйныя зьвесткі карыстальнікаў, плацежную інфармацыю ці ўкараняць шкодны код.
Гэта нясе пагрозы ўладальнікам і карыстальнікам сайтаў.
Празь вялікую небясьпеку ў некаторых краінах часова адключалі дзяржаўныя рэсурсы і сайты кампаніяў, каб перадухіліць узломы.
У Беларусі функцыі рэгулятара ў сфэры інфармацыйна-камунікацыйных тэхналёгіяў і сувязі ажыцьцяўляюць два дзяржаўныя органы:
- Апэратыўна-аналітычны цэнтар пры прэзыдэнту, які выконвае функцыі рэгулятара ў сфэры інфармацыйна-камунікацыйных тэхналёгіяў, кантралюе інтэрнэт-бясьпеку і кіруе доступам да беларускага сэгмэнту інтэрнэту.
- Міністэрства сувязі і інфарматызацыі, якое адказвае за агульнае рэгуляваньне і кіраваньне сувязьзю, разьвіцьцё тэлекамунікацыйнай інфраструктуры і разьмеркаваньне радыёчастотнага спэктру.