Дзяржсакратар ЗША Марка Рубіё заявіў, што расейская вайна ва Ўкраіне цяпер нагадвае «стратэгічны тупік», і папярэдзіў пра рызыку эскаляцыі і ўзмацненьня расейскіх атак на ўкраінскую энэргасыстэму ўзімку. Ён дапусьціў, што эскаляцыя можа закрануць і краіны NATO, піша «Голос Америки».
ЗША працягнуць вывучаць магчымасьці дыпляматычнага ўрэгуляваньня, але «ня будуць інвэставаць у марныя працэсы, калі нам не ўдаецца дасягнуць прагрэсу», заявіў дзяржсакратар.
У інтэрвію грэцкаму выданьню Kathimerini, апублікаваным 8 кастрычніка, кіраўнік амэрыканскай дыпляматыі, у прыватнасьці, заявіў:
«Цяпер, на жаль, я думаю, гэта стратэгічны тупік, што небясьпечна. Са стратэгічнага тупіку можна выйсьці толькі адным з двух шляхоў: праз урэгуляваньне шляхам перамоваў або праз эскаляцыю з боку аднаго ці абодвух бакоў, якая ўрэшце выйдзе за межы першапачатковага канфлікту», — адзначыў дзяржсакратар ЗША.
Рубіё дадаў, што ня бачыць «пэрспэктываў для ўрэгуляваньня шляхам перамоваў», але ЗША «працягваюць вывучаць усе магчымасьці», каб завяршыць гэтую вайну дыпляматычным шляхам.
«Мы гатовыя адыгрываць якую-колечы магчымую ролю, каб паспрыяць гэтаму працэсу. Мы ўжо спрабавалі зрабіць гэта ў мінулым, але пакуль дасягнуць посьпеху не ўдалося», — сказаў дыплямат.
ЗША «зь вялікай занепакоенасьцю» сочаць за рызыкамі пашырэньня вайны за межы Ўкраіны.
«Толькі ўчора ў Чорным моры некалькі суднаў былі атакаваныя ў выніку скаардынаванай атакі бесьпілётнікаў. Нас таксама непакоіць імавернасьць дывэрсійнай апэрацыі ў суседняй краіне, якая можа выйсьці з-пад кантролю. Увесь сьвет успрымае гэтую сытуацыю як такую, што можа перарасьці ў больш маштабны канфлікт», — заявіў Марка Рубіё.
ГЛЯДЗІЦЕ ТАКСАМА:
Дзяржсакратар ЗША адзначыў гатоўнасьць Рыгі да ўзаемадзеяньня зь Менскам у пытаньні нелегальнай міграцыіПадчас прэс-канфэрэнцыі ў Партугаліі 8 кастрычніка Рубіё дадаў, што патэнцыйная эскаляцыя расейскай вайны ва Ўкраіне «вельмі небясьпечная», бо можа набыць выгляд «дывэрсійнай кампаніі ў суседніх краінах, якія ўваходзяць у NATO», і ператварыць вайну паміж дзьвюма краінамі ў «значна шырэйшы і небясьпечнейшы рэгіянальны канфлікт».
Рубіё выказаў спадзяваньне, што менавіта рызыка эскаляцыі можа прывесьці абодва бакі за стол перамоваў. «Мы ня верым, што гэтую вайну можна завяршыць ваенным шляхам», — дадаў ён.
«У той жа час мы ня будзем укладаць рэсурсы ў марныя працэсы, калі нам не ўдаецца дасягнуць прагрэсу», — падкрэсьліў Марка Рубіё.
Каменем спатыкненьня ў перамоўным працэсе Рубіё назваў тэрытарыяльныя прэтэнзіі Расеі на Данецкую вобласьць Украіны.
«Расейцы лічаць перамогай поўны кантроль над Данецкай вобласьцю. Яны неаднаразова заяўлялі пра гэта як пра сваю мэту і працягваюць на гэтым настойваць. Для Ўкраіны ж такая ўмова абсалютна непрымальная. І таму нам пакуль не ўдалося знайсьці дыпляматычнага рашэньня, але мы гатовыя паспрыяць яму, калі зможам адыграць канструктыўную ролю», — патлумачыў ён.
Марк Рубіё падчас прэс-канфэрэнцыі ў Лісабоне, 8 кастрычніка 2026 году
Паводле Рубіё, ёсьць відавочныя прыкметы таго, што Расея гэтай зімой будзе зьнішчаць рэшткі ўкраінскай энэргетыкі, каб прымусіць Украіну да капітуляцыі.
Вайна ва Ўкраіне, а таксама падзеі ў Армускай пратоцы і патэнцыйныя пагрозы ў Чырвоным моры зрабілі відавочнай «неабходнасьць дывэрсыфікацыі шляхоў паставак энэргарэсурсаў у сьвеце», падкрэсьліў Марка Рубіё.
ЗША плянуюць актыўна супрацоўнічаць зь іншымі краінамі дзеля стварэньня альтэрнатыўных энэргашляхоў, дадаў дзяржсакратар ЗША.
«Нашыя ланцужкі паставак праходзяць цераз адныя з самых нестабільных рэгіёнаў плянэты. Таму для нас гэта надзвычай важны прыярытэт, — адзначыў дыплямат. — Мы разумеем, што існуюць пэўныя перашкоды і цяжкасьці, і маем намер прыкладаць дыпляматычныя намаганьні, каб нагадваць усім бакам, наколькі гэта для нас важна і чаму гэта мае значэньне», — сказаў дзяржаўны сакратар ЗША.
Міністар замежных справаў Вялікай Брытаніі Эд Мілібэнд і прэзыдэнт Украіны Ўладзімір Зяленскі размаўляюць з журналістамі падчас наведваньня месца расейскага ракетнага ўдару па шматкватэрным жылым доме ў Прылуках, 8 кастрычніка 2026 году
Прэзыдэнт Украіны Ўладзімір Зяленскі ў адказ на заяву пра тупік у мірным працэсе заклікаў ЗША ўзмацніць эканамічны ціск на Расею, даць Украіне доступ да сувязі Starlink над расейскай тэрыторыяй і не дамаўляцца з Крамлём пра новыя праекты.
«Нельга з аднаго боку дамаўляцца з рускімі пра нейкія эканамічныя праекты на будучыню, а зь іншага — казаць, што мы ў... дыпляматычным тупіку. Мы не ў дыпляматычным тупіку. Перакрыйце ім усю эканоміку. Заткніце Расеі рот. Не падкормлівайце іх сваімі продажамі. Проста накладзіце санкцыі на іхную зброю. Адкрыйце Starlink нам, для Ўкраіны», — заклікаў прэзыдэнт Украіны.
«Мы — людзі, лідэры, палітыкі — самі сябе заганяем у тупік... Нават у першы дзень вайны мы не былі ў тупіку. Бо адзін чалавек паспрабаваў загнаць цэлы народ у тупік, а народ паўстаў і абараняў сваю дзяржаву», — дадаў прэзыдэнт Украіны.
Прадстаўнік Белага дому паведаміў «Голасу Амэрыкі», што прэзыдэнт ЗША «хоча, каб гэтая вайна была ўрэгуляваная і каб спыніліся бессэнсоўныя забойствы».
«Злучаныя Штаты па-ранейшаму імкнуцца адыгрываць канструктыўную ролю, падтрымліваючы кантакты з абодвума бакамі і працуючы над спыненьнем вайны», — сказаў прадстаўнік.