Ва Ўкраіне пачалі завочнае дасудовае расьсьледаваньне супраць Юрыя Ільіна, які падчас масавых акцый пратэсту ў 2014 годзе ачоліў Генэральны штаб Узброеных сілаў Украіны. Яго справу вылучылі ў асобнае вядзеньне.
Яму выставілі падазрэньне паводле чатырох артыкулаў — ч. 1 арт. 255 (стварэньне, кіраўніцтва і ўдзел у злачыннай арганізацыі), арт. 340 (незаконныя перашкоды службовай асобы арганізацыі або правядзеньню сходаў, мітынгаў, вулічных шэсьцяў і дэманстрацый з выкарыстаньнем фізычнага гвалту), ч. 2 арт. 365 (перавышэньне ўлады або службовых паўнамоцтваў, што суправаджалася гвалтам або выкарыстаньнем зброі ці спэцыяльных сродкаў), ч. 1 арт. 408 Крымінальнага кодэксу Ўкраіны (дэзэртырства). Яму пагражае ад трох да 12 гадоў пазбаўленьня волі.
Юры Ільін. Ва ўкраінскіх СМІ паведамлялі, што менавіта ён аддаў загад на зачыстку Майдану
У матэрыялах справы адзначаецца, што Ільін, які ў дні найбольшага супрацьстаяньня паміж пратэстоўцаў і сілавікамі ачоліў Генэральны штаб, вывеў на дапамогу міліцыі ў Кіеве сама меней 1790 вайскоўцаў з зброяй і вайсковай тэхнікай зь ліку найбольш баяздольных падразьдзелаў для фактычных перашкодаў правядзеньню акцыяў.
Адпаведныя загады і распараджэньні Ільін выдаў 19 і 20 лютага 2014 году. У гэтыя дні вайскоўцы і вайсковая тэхніка пад выглядам удзелу ў антытэрарыстычнай апэрацыі зьявілася ўва ўсіх гарадах Украіны, якія далучыліся да пратэстаў.
У прыватнасьці, у дапамогу міліцыі вылучылі вайскоўцаў правапарадку Ўзброеных сілаў, асобнага атраду для барацьбы з падводна-дывэрсійнымі сіламі і сродкамі вайскова-морскіх сілаў, асобнага палку прэзыдэнта Ўкраіны, асобнай паветрана-дэсантнай і аэрамабільнай брыгады камандаваньня высокамабільных дэсантных войскаў, забясьпечаных штатнай стралковай зброяй (пісталетамі, аўтаматамі і кулямётамі), шаломамі, бронекамізэлькамі і процігазамі. Ім надалі не прадугледжаныя для вайскоўцаў паўнамоцтвы — на затрыманьне грамадзян, праверку дакумэнтаў, надгляд асабістых рэчаў грамадзян і транспарту, абмежаваньне руху і магчымасьць уваходзіць у жытло без рашэньня суду.
У выніку супрацьпраўнага і празьмернага выкарыстаньня сілы пад выглядам антытэрарыстычнай апэрацыі з 16:00 18 лютага да 6:00 19 лютага былі забітыя 13 чалавек, 47 чалавек атрымалі цяжкія раненьні, 76 асобаў — раненьні сярэдняй цяжкасьці і 139 — лёгкай ступені. Апроч таго, у выніку неапраўданага выкарыстаньня войскаў загінулі 9 міліцыянтаў, яшчэ 14 атрымалі цяжкія цялесныя пашкоджаньні, 26 — сярэдняй цяжкасьці і 82 — лёгкія пашкоджаньні.
Апроч таго, празь незаконнае блякаваньне цэнтру Кіева адбыўся пажар у будынку Фэдэрацыі прафсаюзаў Украіны, у выніку якога загінулі два чалавекі і часткова пашкоджана маёмасьць.
ГЛЯДЗІЦЕ ТАКСАМА:
Януковіч пра Майдан: «Я не аддаваў загаду страляць»Што вядома пра Ільіна
Юры Ільін нарадзіўся ў Рагачове Гомельскай вобласьці, скончыў спачатку Менскую сувораўскую вучэльню, а потым Адэскую вышэйшую артылерыйскую камандную вучэльню і Нацыянальны ўнівэрсытэт абароны Ўкраіны. Генэральным штабам Узброеных сілаў Украіны ў 2014 годзе ён кіраваў 9 дзён.
Пасьля ўцёкаў тагачаснага прэзыдэнта Віктара Януковіча выканаўца абавязкаў кіраўніка дзяржавы Аляксандар Турчынаў адправіў яго ў адстаўку і накіраваў у рэзэрву Генэральнага штабу. Адразу пасьля гэтага Ільін паехаў у Крым і застаўся там пасьля анэксіі паўвострава Расеяй.
Юры Ільін выступае ў судзе сьведкам у справе Януковіча па відэаканфэрэнцыі з анэксаванага Крыму, 2018 год
Пазьней ён у рэжыме відэаканфэрэнцыі даваў паказаньні ў справе аб дзяржаўнай здрадзе Віктара Януковіча. У прыватнасьці, ён адзначыў, што Януковіч паведаміў яму аб сваіх намерах зьвярнуцца да прэзыдэнта Расеі Ўладзіміра Пуціна з просьбай увесьці «міратворчую місію», бо жыхары ўсходніх вобласьцяў Украіны былі незадаволеныя зьменай улады пасьля Майдану.
Юры Ільін застаецца ў Крыме, з журналістамі не кантактуе.
На сайце выпускнікоў Менскай сувораўскай вучэльні адзначаецца, што ён наведваў Менск у 2013 годзе і ўдзельнічаў ва ўрачыстасьцях 60-годзьдзя стварэньня гэтай навучальнай установы. Там жа адзначаюць, што цяпер адмірал мае цяпер сваю будаўнічую кампанію, якая займаецца будаўніцтвам жылых і нежылых дамоў.
ГЛЯДЗІЦЕ ТАКСАМА:
Ва Ўкраіне ўшаноўваюць герояў Нябеснай сотні, загінулых у часе пратэстаў 12 гадоў таму. Сярод іх два беларусыШто папярэднічала
Масавыя шматмесячныя акцыі пратэсту ва Ўкраіне пачаліся ў лістападзе 2013 году, калі тагачасны прэзыдэнт Украіны Віктар Януковіч адмовіўся ад падпісаньня пагадненьня аб асацыяцыі Ўкраіны ў Эўразьвяз.
Найбольш драматычныя падзеі на пратэстаў адбыліся 20 студзеня і 18–20 лютага 2014 году, калі ў выніку выкарыстаньня зброі загінулі шмат грамадзян, у тым ліку два беларусы: Міхась Жызьнеўскі (загінуў 22 студзеня 2014 году) і грамадзянін Украіны, этнічны беларус, колішні дэпутат парлямэнту Якаў Зайко (памёр 18 лютага 2014 году ад інфаркту, калі ўцякаў ад беркутаўцаў на вуліцы Інстытуцкай у Кіеве).
У істоце, пасьля гэтых падзей пачалася расейская агрэсія супраць Украіны — спачатку ў выглядзе анэксіі Крыму, а потым акупацыі частак Данецкай і Луганскай вобласьцяў Украіны.