9 верасьня кампанія Apple прэзэнтавала новыя смартфоны: першую ў гісторыі кампаніі раскладны iPhone Duo з тытану. Новы смартфон абсталяваны двайной камэрай на 48 мэгапіксэляў і франтальнай камэрай. Продажы гэтай мадэлі пачнуцца 23 кастрычніка па цане ад 1999 долараў за мадэль з памяцьцю 256 гігабайтаў.
Таксама кампанія прэзэнтавала смартфоны асноўнай флягманскай лінейкі: iPhone 18 Pro і Pro Max. Яны выйдуць у чатырох колерах: апроч чорнага і срэбнага, зьявяцца блакітны і бардовы. Асноўная камэра на 48 мэгапіксэляў у гэтых смартфонаў абсталяваная пераменнай дыяфрагмай. Цана iPhone 18 Pro за мадэль на 256 гігабайт пачынаецца з 1199 даляраў, на iPhone 18 Pro Max — з 1299 даляраў. Продажы стартуюць з 18 верасьня.
Што з коштамі у Беларусі
Беларускія пасярэднікі ўжо прапануюць замовіць новыя смартфоны загадзя. Напрыклад, 21vek.by прапануе iPhone 18 Pro за 7999 рублёў, гэта 2641 даляр, больш чым удвая за цану ў Apple.
Apple iPhone 18 Pro Max у той самай онлайн-краме 21vek.by па перадзамове каштуе 9099 рублёў, ці 3004 даляры. Абедзьве мадэлі абяцаюць даставіць толькі 22 кастрычніка.
Самы дарагі варыянт — «раскладушка» iPhone Duo Night Sky па перадзамове ў Беларусі каштуе зараз 14499 рублёў, ці 4788 даляраў.
Кошты на iPhone Duo Night Sky на сайце беларускага прадаўца 21vek.by
Гэтую мадэль абяцаюць даставіць толькі да 26 лістапада.
Параўналі кошты на перадзамову ў Беларусі і ў эўрапейскіх суседзяў на самую дарагую мадэль iPhone Duo Night Sky:
Як смартфоны iPhone трапляюць у Беларусь і чаму такія кошты
У 2022 годзе пасьля пачатку расейскага ўварваньня ва Ўкраіну Apple сышоў з беларускага і расейскага рынкаў, афіцыйна гэтая тэхніка ў Беларусь не трапляе.
Беларускія кампаніі закупляюць тэхніку Apple праз іншыя краіны бяз згоды вытворцы, то бок наладзілі паралельны імпарт. Напрыклад, на сайце apples.by, які прадае гэтую тэхніку ў Менску, адкрыта напісана, што iPhone у Беларусь вязуць «праз схемы паралельнага імпарту з Кітаю, Аб’яднаных арабскіх эміратаў, Турцыі, і краін ЭАЭС». Таксама смартфоны трапляюць у Беларусь праз краіны ЭЗ, ЗША, Карэю і Японію, але праз неафіцыйных трэйдэраў
На ўмовах ананімнасьці Свабода пагаварыла з карыстальнікамі iPhone у Беларусі. Адна з суразмоўцаў якраз нядаўна набывала сабе смартфон гэтай маркі, але ня самай новай мадэлі. Ён аказаўся зроблены для індыйскага рынку, але нейкіх праблем з ім не было, кошты на яго таксама ня так моцна адрозьніваліся ад эўрапейскіх, бо гэта была ня новая мадэль.
Ілюстрацыйнае фота
Іншы суразмоўца адзначыў, што кошты на новыя мадэлі такія высокія ў Беларусі, бо яны толькі выйшлі. Гэта жаданьне прадаўцоў «па-хуткаму наварыцца». Пасьля кошты стабілізуюцца, але «у краінах, дзе афіцыйныя дылеры, гэта адбудзецца адразу пасьля зьяўленьня новых мадэляў у крамах, а ў Беларусі месяцы праз два».
Вось як выглядаюць кошты на мадэлі, якія ўжо ёсьць у крамах у Беларусі і суседніх краінах, куды гэтая тэхніка трапляе афіцыйным шляхам, напрыклад, на iPhone 17 (256 гігабайт):
- Беларусь — 1033 эўра (3599 рублёў)
- Літва — 969 эўра
- Польшча — 829-1036 эўра (3599-4499 злотых)
Як бачым, на не самыя новыя мадэлі кошты ў Беларусі і ЭЗ адрозьніваюцца не нашмат.
Што з гарантыяй і абслугоўваньнем
На сайце 21vek.by прапісана, што гарантыя на новыя мадэлі айфонаў — 1 год. Таксама за дадатковую плату гарантыю можна зрабіць даўжэйшай — за 1448 рублёў на 2 гады.
Адна з суразмоўцаў Свабоды, якая набывала сабе iPhone у Беларусі, якраз таму не захацела яго набываць у іншай краіне, бо там узьнікнуць складанасьці з гарантыяй: давядзецца яго туды везьці ў выпадку тэхнічных праблемаў.
Таксама ў Менску ёсьць некалькі сэрвісных цэнтраў, якія абяцаюць рамонт тэхнікі Apple, усе назвы сайтаў гэтых сэрвісаў так ці інакш выкарыстоўваюць назву брэнда.
Пры гэтым, прамых сэрвісных цэнтраў ад кампаніі вытворцы ў Беларусі няма, бо яна сышла з беларускага рынку.