Паводле Мацкевіча, нават калі беларускія ўлады пакуль не гатовыя прызнаць свае памылкі, пайсьці на саступкі і вызваліць усіх палітвязьняў, яны маглі б хаця б спыніць агрэсіўную прапагандысцкую рыторыку.
«Калі ўзяць рыторыку тых, хто ня мае ўлады, але плявузгае там сваім языком, кшталту розных Азаронкаў, Дзермантаў, Мукавозчыкаў і так далей. Ну, гэта ж брыдота. Хоць бы спыніць гэтую брыдоту. Калі вы ўжо не гатовыя зараз прызнаць свае памылкі, сваю паразу і пайсьці на саступкі, спыніце», — сказаў Мацкевіч у праграме «ПіК Свабоды».
На ягоную думку, за больш чым тры дзесяцігодзьдзі ва ўладзе Лукашэнка павінен быў бы хаця б «памаўчаць», калі ён ня можа дзейнічаць самастойна.
Мацкевіч таксама заявіў, што вызваленьне асобных палітвязьняў і асобныя кантакты беларускага рэжыму з Захадам яшчэ не азначаюць зьмены палітыкі. Ён заклікаў не прымаць асобныя выпадкі за новую тэндэнцыю і ня верыць «пустым абяцанкам» рэжыму.
Паводле Мацкевіча, пра рэальныя зьмены можна будзе гаварыць толькі тады, калі беларускія ўлады цалкам вызваляць палітвязьняў і спыняць новыя рэпрэсіі.