Нямецкая ультраправая партыя «Альтэрнатыва для Нямеччыны» лідзіруе на выбарах у зямельны парлямэнт (ляндтаг, мясцовы заканадаўчы орган) у Саксоніі-Ангальт.
Згодна з папярэднімі вынікамі дзяржаўнай выбарчай камісіі, «Альтэрнатыва для Нямеччыны» атрымала 43,8% галасоў — прыкладна ўдвая больш, чым на папярэдніх выбарах 2021 года.
У Саксоніі-Ангальт Хрысціянска-дэмакратычны зьвяз (ХДЗ) дзейнага канцлера Фрыдрыха Мэрца атрымаў 17,2%, Сацыял-дэмакратычная партыя — 9,3%, «Зялёныя» — 8,9%, а левыя — 8,6%, зьвяз (BSW) Сары Вагэнкнэхт пераадолеў пяціпрацэнтны бар’ер з 5,3%.
Падобныя вынікі раней паказвалі экзыт-полы.
Паводле папярэдніх зьвестак «Альтэрнатыва для Нямеччыны» атрымала 39 з 83 месцаў у зямельным парлямэнце. Для абсалютнай большасьці ёй неабходна 42 месцы. ХДЗ атрымаў 15 месцаў, СДПГ і «Зялёныя» — па восем, Левая партыя — восем, а BSW — пяць.
Без абсалютнай большасьці партыя ня зможа стаць непадзельнай кіруючай партыяй — ёй давядзецца сфармаваць кааліцыю з адной з партый, якія ўвайшлі ў зямельны парлямэнт.
У той жа час астатнія парлямэнцкія партыі Нямеччыны ў пачатку 2020-х гадоў заключылі паміж сабой пагадненьне аб тым, што яны адмовяцца ад любога супрацоўніцтва з «Альтэрнатывай для Нямеччыны».
Яўка выбаршчыкаў на гэты раз дасягнула 76,5%, што называюць рэкордам з 1990 года.
Першыя рэакцыі
Былы прэмʼер-міністар Вугоршчыны Віктар Орбан назваў вынікі выбараў «вялікім вечарам для Нямеччыны і Эўропы». «Прышпіліце рамяні. Гэта толькі пачатак», — напісаў ён у сацыяльных сетках.
Матэа Сальвіні, лідэр ультраправай італьянскай партыі «Ліга», назваў вынік «Альтэрнатывы для Нямеччыны» «трыюмфальнай перамогай» і сьведчаньнем попыту на зьмены, бясьпеку і працоўныя месцы.
Прэмʼер-міністар Польшчы Дональд Туск, наадварот, заявіў, што ў Польшчы «толькі ідыёты ці здраднікі» могуць радавацца перамозе «Альтэрнатывы для Нямеччыны», і раскрытыкаваў прадстаўнікоў апазыцыйных партый «Права і справядлівасьць» і «Канфэдэрацыя», якія віталі вынік нямецкай партыі.
Амэрыканскі мільярдэр Ілон Маск таксама павіншаваў «Альтэрнатыву для Нямеччыны» зь перамогай.
Чым вядомая «Альтэрнатыва для Нямеччыны»
«Альтэрнатыва для Нямеччыны» — правапапулісцкая партыя, заснаваная ў 2013 годзе. Яна вядомая сваёй антыміграцыйнай палітыкай, эўраскептыцызмам і нацыянальным кансэрватызмам.
«Альтэрнатыва для Нямеччыны» выступае за спыненьне падтрымкі Ўкраіны і за зьбліжэньне з Расеяй. Партыя таксама патрабуе больш жорсткай міграцыйнай палітыкі і больш кансэрватыўных стандартаў адукацыі.
Пры гэтым шмат якія прадстаўнікі партыі выступаюць за бліжэйшыя адносіны з Расеяй.
Партыю падазраюць у атрыманьні фінансаваньня з Крамля, і яе дэпутаты прыяжджаюць на імпрэзы ў Расеі, такія як Санкт-Пецярбургскі міжнародны эканамічны форум або сымпозіюмы «Адзінай Расеі».