«Адысэя» — адзін з найважнейшых помнікаў сусьветнай літаратуры, гісторыя вяртаньня Адысэя дадому пасьля Траянскай вайны.
У 1920-я гады над перакладам «Адысэі» працавалі Юльян Дрэйзін і Міхайла Грамыка. Але іхны даробак на сёньня страчаны. У 1970-я урыўкі з паэмы пераклаў Анатоль Клышка.
І толькі цяпер паэма загучала па-беларуску цалкам. Што, безумоўна, стала значнай падзеяй, сказала старшыня Беларускага ПЭНу Тацяна Нядбай у камэнтары Свабодзе:
«Перакладаць сусьветныя эпасы на беларускую мову важна, бо так беларуская культура ўступае ў непасрэдны дыялёг з эўрапейскай, сусьветнай культурай. І мова, на якой гучыць Гамэр і Вэрлігій, перастае ўспрымацца толькі як мова побыту або лякальнай літаратуры. Яна паказвае, што здольная перадаваць складаныя вобразы, думкі, рытмы і ўвесь досьвед чалавецтва.
Таксама такія пераклады разьвіваюць беларускую мову, узбагачаюць яе слоўнік і літаратурныя магчымасьці.
Ну, і мы можам чытаць клясыку без пасярэдніцтва іншых моваў.
А „Адысэя“ сёньня асабліва блізкая беларусам. Гэта гісторыя чалавека, які доўга блукае па сьвеце, перажывае выпрабаваньні, але не губляе памяці пра свой дом і імкнецца вярнуцца.
Таму беларускі пераклад „Адысэі“ — гэта ня толькі значная літаратурная падзея, але і вельмі сучасны для нас тэкст пра выгнаньне, вернасьць сваёй зямлі і надзею на вяртаньне».
Да 20 верасьня кнігу можна замовіць па адмысловай цане. Пераклады «Іліяды» Гамэра 2024 году выданьня і «Энэіды» Вэргілія (2025-га) таксама яшчэ даступныя для куплі.