Як паведамляюць на сайце, створаным для інфармаваньня аб пошуку зьніклых альпіністаў, у гэты горад ужо прыехалі сваякі загінулых альпіністаў.
«Пошук трэцяга ўдзельніка групы працягваўся яшчэ два дні і выніку ня даў. Ратаўнікі агледзелі ледаспад на траекторыі выпадзеньня рэчаў і расколіны на гэтым участку. Расколіны забітыя сьнегам, што прыходзіць з новымі лавінамі. Гэта робіць немагчымым выяўленьне цела, калі яно знаходзіцца ў расколіне. Візуальна прыкметаў цела на схіле і ў раёне заплечніка не знайшлі», — адзначаецца ў паведамленьні.
26 жніўня работу ратаўнікоў спынілі на няпэўны тэрмін праз аб’ектыўную небясьпеку для іх саміх: там безупынна адбываюцца каменныя абвалы і лавіны. Усіх ратаўнікоў таксама вывезьлі ў горад Ош. Калі зьявіцца абгрунтаваная вэрсія, дзе шукаць далей, пошукі могуць аднавіць.
Што папярэднічала
9 жніўня стала вядома, што пасьля ўзыходжаньня на пік Курумды 4 жніўня перасталі выходзіць на сувязь два беларускія і адзін літоўскі альпіністы.
43-гадовы Максім Палянскі, 60-гадовы Мікалай Сьвірыдаў і 37-гадовы літоўскі альпініст Сяргей Рубцоў падняліся на пік Курумды вышынёй 6613 мэтраў 1 жніўня і абвясьцілі, што пачнуць спуск 2 жніўня. Яны зьвязаліся з апэратарам і паведамілі, што гатовыя рухацца ў бок базавага лягеру. У прызначаны час 4 жніўня група не прыйшла на кантрольны пункт.
Спачатку кіргіскія ратаўнікі знайшлі намёт зьніклых і некаторыя рэчы альпіністаў.
Раніцай 16 жніўня пры аблёце схілу дрон зьняў месца сходу сьнежна-каменнай масы. Пры разборы відэазапісаў побач са знойдзенымі раней рэчамі выявілі целы двух альпіністаў.