Пастанова ўраду «Аб закрыцьці Пасольства Рэспублікі Беларусь у Фінляндзкай Рэспубліцы» ўжо зарэгістраваная ў Нацыянальным рэестры заканадаўства.
Тэкст пастановы пакуль не апублікаваны. 3 ліпеня на сайце беларускай дыпмісіі зьявілася абвестка пра «часовае прыпыненьне працы», перадае «Позірк».
Наведнікам раюць зьвяртацца ў генконсульства ў Латвіі або ў пасольства ў Швэцыі. Публікацыя інфармацыі пра супрацоўніцтва паміж краінамі спынілася ў 2022 годзе.
Фінляндыя не прызнае Аляксандра Лукашэнку легітымным прэзыдэнтам Беларусі. Улады краіны пасьлядоўна падтрымліваюць беларускія дэмакратычныя сілы і зрабілі ўнёсак у Міжнародны гуманітарны фонд дапамогі і падтрымкі беларускіх палітвязьняў і рэпрэсаваных.
Дыпляматычныя адносіны зь Фінляндыяй Беларусь усталявала 26 лютага 1992 году. У 2010 годзе ў Менску адкрылася аддзяленьне пасольства Фінляндыі ў Літве. А зь сьнежня 2011 году ў Фінляндыі пачало працаваць дыпляматычнае прадстаўніцтва Беларусі.
ГЛЯДЗІЦЕ ТАКСАМА:
Прэзыдэнт М’янмы ў Менску сустрэнецца з Лукашэнкам і адкрые амбасадуЯкія беларускія пасольствы закрылі з 2020 году, а якія адкрылі
«Аптымізацыя сеткі беларускіх замежных установаў» адбываецца з красавіка 2021 году. Пры гэтым павялічваецца колькасьць генэральных консульстваў Беларусі ў Расеі.
✕ З 1 восені 2021 году перастала працаваць пасольства ў Канадзе і Эквадоры.
✕ ✓ Увосень 2023 году Менск закрыў пасольства ў Славаччыне. Апошнім паслом у Славаччыне быў Ігар Ляшчэня, які выступіў у падтрымку беларусаў, якія выйшлі на мірныя пратэсты пасьля прэзыдэнцкіх выбараў. Аднак пасьля таго, як прэм’ер-міністрам Славаччыны стаў Робэрт Фіца, місію вырашылі зноў адкрыць. Новы беларускі пасол уручыў даверчыя граматы прэзыдэнту Славаччыны ў студзені 2025 году.
✓ ✕ Пасольства ў Экватарыяльнай Гвінеі пасьпелі ўжо і адкрыць (2024), і закрыць (2026).
✓ Новыя пасольствы адкрыліся ў Зымбабвэ (2022) і Ватыкане (2025).
✓ У плянах адкрыцьцё беларускіх пасольстваў у КНДР, М’янме і Амане.