Як паведаміла дзяржаўнае агенцтва БелТА з спасылкай на Міністэрства замежных спраў, сярод пацярпелых — шэсьць непаўналетніх дзяцей, якія атрымалі розныя траўмы.
У мікрааўтобусе Mercedes-Benz Sprinter знаходзіліся 19 грамадзян Беларусі.
«Паводле інфармацыі МУС Грузіі, кіроўца мікрааўтобусу не забясьпечыў бясьпечнае кіраваньне транспартным сродкам, у выніку чаго мікрааўтобус зьехаў з дарогі і ўпаў у цясьніну», — адзначылі ў МЗС Беларусі.
ГЛЯДЗІЦЕ ТАКСАМА:
«Бус надвае зламала, частка людзей вылецела праз вокны». Сьведка аварыі ў Грузіі, дзе загінулі чацьвёра беларусаў, расказаў падрабязнасьціБеларусаў шпіталізавалі ў дзьве розныя лякарні, лекары сьцьвярджаюць, што пагрозы іхнаму жыцьцю няма.
«Амбасада Беларусі ў Грузіі надае ўсё неабходнае консульскае садзейнічаньне. Консул Беларусі ў Грузіі ўжо выехала на месца здарэньня», — адзначылі ў зьнешнепалітычным ведамстве.
Што папярэднічала
За апошні час гэта другая аўтакатастрофа ў Грузіі, у якой загінулі грамадзяне Беларусі.
Сёлета 25 ліпеня ў Батумі ў выніку сутыкненьня турыстычнага мікрааўтобуса з беларускімі пасажырамі і легкавіка загінулі два грамадзяніна Беларусі — 43-гадовая жанчына і мужчына 63 гадоў. Яшчэ 12 чалавек атрымалі рознай цяжкасьці траўмы.
Паводле відавочцаў, удар быў настолькі моцны, што некаторыя пасажыры выпалі з салёну. Ад удару мікрааўтобус перакуліўся, а легкавік урэзаўся ў будынак Батумскага ўнівэрсытэту мастацтваў.
МУС Грузіі вядзе сьледзтва, каб выявіць прычыны аварыі і вінаватых у ёй.