Ад 5 жніўня многія беларусы ва Ўкраіне могуць зрабіцца нелегаламі. Гэта зьвязана зь сёлетняй пастановай украінскага ўраду пра абмен пасьведчаньняў на часовае пражываньне ва Ўкраіне.
У праграме «ПіК Свабоды» праблему патлумачыла прадстаўніца фонду BySol ва Ўкраіне Маша Анімія.
«На жаль, такая сытуацыя ня тое, што можа здарыцца, — такая сытуацыя здарыцца. Ад 5 жніўня цалкам уступіць у сілу пастанова, і беларусы, у якіх скончыліся беларускія пашпарты, ня змогуць падоўжыць сабе часовы від на жыхарства і стануць нелегаламі на тэрыторыі Украіны.
Што з гэтым рабіць, на гэты момант рашэньня няма. Ёсьць шмат спробаў неяк пасунуць, павялічыць гэты тэрмін, магчыма, унесьці нейкія дадатковыя папраўкі. На жаль, тэрмін сапраўды вельмі кароткі. І напэўна адзіным, што можна цяпер назваць нечым падобным на выйсьця з гэтай сытуацыі, гэта падача на ўцякацтва і дадатковую абарону».
Маша Анімія кажа, што ня бачыць адрозьненьняў у стаўленьні да беларусаў і да іншых замежнікаў падчас цяперашняй перарэгістрацыі ва Ўкраіне.
«Проста атрымліваецца такі заканадаўчы правал, дзе не прадугледзелі гэтага пытаньня. Не прадугледзелі сытуацыі, калі ў людзей заканчваюцца пашпарты, а яны ня могуць вярнуцца ў краіну паходжаньня, каб яго бясьпечна прадоўжыць. Такое ня часта сустракаецца ў прадстаўнікоў іншых краін.
Калі выходзіла пастанова Кабінэту міністраў № 141, у ёй былі і плюсы. Для тых, хто праходзіць службу ў сілах абароны, у тым ліку для беларусаў, ёсьць магчымасьць падавацца з пратэрмінаванымі пашпартамі. А вось з цывільнымі атрымаўся такі заканадаўчы правал.
Што з гэтым рабіць і як мы будзем з гэтым працаваць? Нам трэба паказаць вострую неабходнасьць рашэньня, прапанаваць нейкія магчымыя варыянты і максымальна садзейнічаць украінскаму ўраду — гэта значыць падаваць максымальную інфармацыю аб беларусах, аб іх колькасьці і паказаць наколькі маштабнай зьяўляецца гэтая праблема».
Вось што прадстаўніца фонду BySol ва Ўкраіне раіць рабіць тым беларусам, у якіх скончыліся пашпарты:
«Я б раіла ім заняцца гэтым пытаньнем, не чакаючы апошняга дня, а ўжо зараз зьвяртацца ў арганізацыі, у інстытуцыі, якія могуць кансультаваць беларусаў ва Ўкраіне, расказваць пра свае кейсы.
Таму што чым больш такіх выпадкаў такія арганізацыі змогуць зафіксаваць і апэляваць гэтым у кантактах з украінскім урадам, тым больш зразумелай будзе гэтая праблема. Варта зьвяртацца па кансультацыі аб падачы на ўцякацтва і дадатковую абарону, калі ў сытуацыі чалавека гэта магчыма».