Памінальная імша распачнецца а 14.00 у касьцёле сьвятога Аляксандра на плошчы Трох Крыжоў.
Грамадзянская паніхіда адбудзецца а 15.30 у Музэі Вольнай Беларусі па вуліцы Фоксаль, 11 (Foksal 11).
Сям’я просіць абмежаваць колькасьць кветак.
Раней родныя пісьменьніцы ўзялі крэдыт на разьвітаньне. Фонд BySol на іх просьбу пачаў збор грошай, і ўсю суму ў 6 тысяч эўра сабралі за некалькі гадзін. На раніцу 23 ліпеня сабралі ўжо 6354 эўра.
Па цырымоніі разьвітаньня цела Сьвятланы Курс плянуюць перавезьці ў Беларусь і там пахаваць.
Хто такая Сьвятлана Курс
Пра сьмерць адной з найвядомейшых беларускіх пісьменьніц сучаснасьці паведаміла сям’я. Пазьней стала вядома, што яна памерла 19 ліпеня.
Сьвятлана Курс паходзіць зь Любаншчыны. Яна даўно жыла ў Польшчы.
У першым нумары часопісу Аrche ў 1998 годзе было апублікавана яе першае апавяданьне «Мы два Хохлікі». У 2008 годзе ў «Кнігарні Нашай Нівы» выйшаў зборнік апавяданьняў «Шлях дробнай сволачы». У 2015 годзе яна апублікавала ў «Нашай Ніве» апавяданьне «Параска і яе чорны бык» не пад псэўданімам, а пад сапраўдным прозьвішчам.
У 2020 годзе пад псэўданімам Ева Вежнавец выйшла яе кніга «Па што ідзеш, воўча?» (выдавецтва «Пфляўмбаўм»/Выдавец Раман Цымбераў). Твор пераклалі на некалькі моваў сьвету, а кніга стала адной з найбольш прадаваных у беларускіх кнігарнях. У 2021 годзе яна атрымала за кнігу прэмію Ежы Гедройця.
У канцы чэрвеня кнігу Сьвятланы Курс (Евы Вежнавец) «Па што ідзеш, воўча?» у перакладзе Малгажаты Бухалік на польскую ўключылі ў доўгі сьпіс польскай прэміі Angelus. У пачатку ліпеня Сьвятлана на сваёй старонцы ў Фэйсбуку прасіла прывезьці ёй пэўную кнігу зь Беларусі. Празь некалькі дзён яе ня стала.
Летась стала вядома, што ў Курс дактары знайшлі рак яечніка ў позьняй стадыі.
У траўні беларусы сьвету за адзін дзень сабралі для пісьменьніцы 12 тысяч эўра на лячэньне замест 10 тысяч, якія прасілі на зборы.