Дарадца міністра абароны Ўкраіны Сяргей «Флэш» Бяскрэснаў дапусьціў, што Расея можа працягваць часамі выкарыстоўваць рэтрансьлятары на тэрыторыі Беларусі для накіраваньня ўдарных бесьпілётнікаў.
Свае меркаваньні ён падмацаваў прыкладам атакі на АЗС у Маліне Кіеўскай вобласьці, пішучы пра гэта ў фэйсбуку. Паводле Бяскрэснава, «Шахед» праляцеў уздоўж мяжы зь Беларусьсю, даляцеў да Карасьцяня проста над трасай, пасьля чаго рэзка павярнуў і паляцеў над чыгункай да Маліны, дзе ўдарыў па АЗС.
«Такія паводзіны характэрныя для ручнога кіраваньня БПЛА па камэры. Адлегласьць ад пункту нападу да межаў Расеі складае 260 км. Гэта занадта далёка для працы простага радыёканалу. Іншых „Шахедаў“ (магчымых рэтрансьлятараў) у гэты час у паветры не было», — напісаў ён.
Канчатковыя высновы зробяць профільныя службы. Дарадца мяркуе, што расейцам важна атакаваць заходнюю частку Ўкраіны «Шахедамі» з онлайн-кіраваньнем, а без рэтрансьлятараў у Беларусі гэтага зрабіць нельга.
Далей «Флэш» задае пытаньне пра самастойнасьць Лукашэнкі. Ён дапушчае, што ягоны рэжым ня ў стане пільнаваць усе падзеі належным чынам, асабліва ва ўмовах, калі расейцы маюць так шмат прасторы ў беларускім жыцьці.
«Ці зможа Лукашэнка выстаяць перад „настойлівымі просьбамі“ пра рэтранслятары, я ня ведаю. Я таксама не выключаю, што рэтрансьлятары могуць усталёўвацца бязь ведама ўладаў Беларусі. Гэта робіцца хутка і лёгка. Таму ім трэба ўважліва сачыць за тым, што адбываецца ў іхнай краіне», — дадаў ён.
ГЛЯДЗІЦЕ ТАКСАМА:
Расейцы стаяць у чэргах па бэнзін. А як запраўляюцца на АЗС украінцы пад пастаяннымі расейскімі атакамі? ФОТА і ВІДЭАПраблема рэтрансьлятараў у Беларусі
6 ліпеня 2026 году Аляксандар Лукашэнка расказаў пра «гібрыдную» вайну супраць Беларусі і паабяцаў, што не адправіць беларускае войска на вайну ва Ўкраіну.
Гэта быў адказ на абвастрэньне тэмы, калі ў замежнай прэсе зьявіліся публікацыі пра тое, што расейскі прэзыдэнт Уладзімір Пуцін цісьне на Лукашэнку, каб той паўнавартасна далучыўся да вайны супраць Украіны.
Перад гэтым Лукашэнка ня раз заяўляў, што беларускае войска рыхтуецца да вайны. Але ніколі не ўдакладняў, якой. Тон прапаганды застаецца антызаходнім.
Пачынаючы з 19 чэрвеня, прэзыдэнт Украіны Ўладзімір Зяленскі тройчы публічна абвінаваціў улады Беларусі ў тым, што на яе мяжы з Украінай ёсьць абсталяваньне, якое расейцы выкарыстоўваюць для карэктаваньня атак на Ўкраіну. Палітык заклікаў непрызнанага кіраўніка Беларусі прыбраць абсталяваньне цягам тыдня, іначай Беларусь чакаюць наступствы.
Зяленскі таксама заявіў, што Ўкраіна ведае «пра кожны завод у Беларусі, які працуе на Расею і гэтую вайну», у тым ліку пра кампанію, якая пастаўляе складнікі для расейскай зброі, і пра кампанію, якая пастаўляе паліва ў Расею.
У Кіеве адзначалі, што толькі за першыя пяць месяцаў 2026 году пастаўкі бэнзіну зь Беларусі ў Расею павялічыліся ў 13 разоў, а дызэльнага паліва — утрая ў параўнаньні з аналягічным пэрыядам летась.
Увечары 24 чэрвеня Зяленскі заявіў, што рэтрансьлятары ў Беларусі перасталі працаваць 22 чэрвеня, гэта значыць праз тры дні пасьля ягонага ўльтыматуму.
Апошнімі тыднямі, аднак, пачасьціліся чуткі пра тое, што рэтрансьлятары на тэрыторыі Беларусі ня зьнішчаныя і могуць быць зноў выкарыстаныя для большай дакладнасьці расейскіх атак.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.