Грамадзянін Беларусі арыштаваны за «працу на замежную выведку», паведаміла 2 ліпеня Агенцтва ўнутранай бясьпекі Польшчы (ABW). З паведамленьня вынікае, што ён рабіў фота- і відэаздымкі імпрэзаў беларускіх дэмакратычных сілаў у Варшаве, а гэтыя матэрыялы пасьля выкарыстоўваліся ў прапагандзе рэжыму Лукашэнкі.
Як паведамляе сайт ABW, «25 чэрвеня 2026 году ў Варшаве супрацоўнікі ABW затрымалі грамадзяніна Беларусі і грамадзяніна Польшчы, якія выконвалі платныя заданьні, даручаныя замежнымі спэцслужбамі».
Яны вялі фотадакумэнтацыю і відэазапісы акцыяў, арганізаваных беларусамі Варшавы. Гэтыя матэрыялы затым выкарыстоўваліся ў прапагандысцкай прадукцыі кіроўнага ў Беларусі рэжыму.
«Гэта чарговы акт справы, які дэманструе, што чужыя службы спрабуюць выкарыстоўваць нават легальныя сацыяльныя і грамадзкія імпрэзы для рэалізацыі ўласных інтарэсаў. Мэта такіх дзеяньняў — ня толькі збор інфармацыі, але і аказаньне ціску, запалохваньне эміграцыйных асяродкаў і ўзмацненьне прапагандысцкіх пасланьняў дзяржаваў, варожых Польшчы», — заяўляе ABW.
Пасьля азнаямленьня з доказамі раённы суд у Любліне пастанавіў зьмясьціць грамадзяніна Беларусі пад варту на тры месяцы. Да грамадзяніна Польшчы пракурор ужыў меры стрыманьня, ня зьвязаныя з пазбаўленьнем волі: забарону пакідаць краіну ў спалучэньні з забраньнем пашпарта і паліцэйскім наглядам.
Каго затрымалі раней
Гэта ня першы падобны выпадак. У лістападзе летась арыштавалі дваіх грамадзян Украіны і траіх беларусаў. Ім выставілі абвінавачаньні ва ўдзеле ў дзейнасьці замежнай выведкі.
«Расьсьледаваньне працягваецца. Магчымыя далейшыя арышты», — паведамляе ABW.
25–26 лістапада 2025 году ў Варшаве і Беластоку былі затрыманыя пяць падазраваных: грамадзяне Ўкраіны Аляксандар С. і непаўналетняя Сафія Ч., а таксама грамадзяне Беларусі Вікторыя М., Антон М. і Ўладзімер У.
Паводле агенцтва, падазраваных завэрбавалі праз мэсэнджар Telegram, яны фатаграфавалі аб’екты і атрымлівалі інфармацыю аб крытычна важнай інфраструктуры, сыстэмах і аб’ектах, «якія маюць вырашальнае значэнне для бясьпекі Рэспублікі Польшча і яе грамадзян», а таксама разьмяшчалі плякаты і стваралі графіці.