Расейскія войскі атакавалі Ўкраіну 74 ракетамі і 496 дронамі розных тыпаў. Супрацьпаветраная абарона змагла зьняшкодзіць 48 ракет і 476 дронаў. У Расеі заявілі, што стралялі нібыта па вайсковых аб’ектах.
Улады Кіева паведамілі аб лучаньні расейскіх удараў у ноч на 2 ліпеня сама меней у 30 лякацыяў.
«Вораг чарговы раз б’е па жылых кварталах і забівае мірных жыхароў. Маем вельмі сур’ёзныя зруйнаваньні і значную колькасьць пацярпелых, у тым ліку дзяцей», — паведаміў кіраўнік Кіеўскай гарадзкой вайсковай адміністрацыі Цімур Ткачэнка.
Паводле гарадзкіх уладаў, загінулі сама меней 17 чалавек, больш за 80 параненыя.
Мэр Кіева Віталь Клічкопаведаміў, што ў жылым дзевяціпавярховым доме ў Дарніцкім раёне ў выніку пацэльваньня зруйнаваныя шэсьць паверхаў.
У выніку расейскага абстрэлу ў Кіеве пацярпелі 28 лякацыяў у сямі раёнах гораду. Пераважна гэта жылыя дамы і аб’екты цывільнай інфраструктуры.
Улады абвясьцілі жалобу 3 ліпеня.
У Днепрапятроўскай вобласьці два чалавекі атрымалі раненьні, у Палтаўскай — чатыры чалавекі, шмат разбурэньняў у жылым сэктары. Ад моцных абстрэлаў пацярпелі яшчэ тры вобласьці — Кіеўская, Чаркаская і Чарнігаўская. Улады паведамілі аб пажарах у месцах лучаньня.
У Расеі заявілі, што нанесьлі «дакладныя» ўдары па вайсковых аб’ектах
У Міністэрстве абароны Расеі абстрэл Украіны традыцыйна назвалі «адказам на тэрарыстычныя атакі кіеўскага рэжыму на цывільную інфраструктуру Расеі».
Паводле ведамства, расейскія вайскоўцы «нанесьлі масаваны ўдар высокадакладнай зброяй вялікае далёкасьці паветранага, наземнага, морскага базаваньня і ўдарнымі бесьпілётнікамі, у выніку якога пацэлілі ў прадпрыемствы вайсковай прамысловасьці і аб’екты паліўна-энэргетычнага комплексу ў Кіеве і Кіеўскай вобласьці, а таксама інфраструктуру вайсковых аэрадромаў у Днепрапятроўскай, Палтаўскай, Чаркаскай, Чарнігаўскай вобласьцях».