Галоўнакамандуючы Ўзброеных сілаў Украіны Аляксандар Сырскі заявіў, што расейскія войскі рыхтуюцца да наступу на поўначы Ўкраіны і могуць нанесьці ўдар па Чарнігаўшчыне.
«Мы ведаем, што Пуцін паставіў задачу расейскаму Генэральнаму штабу пралічыць розныя варыянты вядзеньня наступальнай апэрацыі, у тым ліку і з тэрыторыі Беларусі ў мэтах захопу Кіева, у мэтах захопу іншых тэрыторыяў», — сказаў Аляксандар Сырскі ў інтэрвію ТСН 30 чэрвеня.
Аднак ён мяркуе, што з улікам апошніх падзеяў кіраўніцтва Беларусі не адважыцца выкарыстоўваць уласную тэрыторыю і надаваць яе агрэсару для выкарыстаньня як пляцдарму для наступу. «У той жа час мы, вядома ж, улічваем і такі варыянт», — дадаў ён.
Аляксандар Сырскі лічыць найбольш рэалістычным наступ расейскіх войскаў з Бранскай вобласьці Расеі. Паводле яго, у межах гэтага варыянту плянуюць наступ на Чарнігаўшчыну «у мэтах захопу тэрыторыі, прасоўваньня ўглыб і такім чынам адцягваньня (украінскіх) войскаў з асноўных важных кірункаў», у тым ліку з тых, дзе ўкраінскія вайскоўцы праводзяць актыўныя дзеяньні.
«Такі спосаб расьцягваньня фронту і пазбаўленьня нас рэзэрваў, зважаючы на агульны лік уласных войскаў і колькасьць баявых брыгадаў, палкоў», — адзначыў ён.
Адказваючы на пытаньне аб пагрозе наступу з тэрыторыі Беларусі, галоўнакамандуючы Ўзброеных сілаў Украіны паведаміў, што ўкраінскае камандаваньне пакуль ня бачыць канцэнтрацыі якіх-небудзь войскаў на беларускай тэрыторыі.
Аляксандар Сырскі выказаў думку, што ажыцьцявіць наступ з боку Беларусі даволі складана, улічваючы вялікую плошчу забалочанай мясцовасьці, празь якую пяхота і цяжкая вайсковая тэхніка ня змогуць прайсьці, а таксама малую колькасьць дарог.
«Калі браць беспасярэдне чарнобыльскі кірунак, там істотная розьніца ў берагах — з нашага боку бераг істотна вышэйшы, чым з боку Беларусі, і практычна зьнішчаныя ўсе масты, па якіх можна перасоўваць тэхніку», — патлумачыў ён.
ГЛЯДЗІЦЕ ТАКСАМА:
Галоўнакамандуючы ўкраінскай арміяй: патрэбна ствараць новыя брыгады на выпадак новага наступу зь БеларусіГалоўнакамандуючы ўкраінскай арміі таксама дадаў, што рэтрансьлятараў, якія працавалі на тэрыторыі Беларусі на карысьць Расеі, пакуль не дэмантавалі. Апроч таго, 29 чэрвеня адзін зь іх дакладна працаваў. «Але, я мяркую, яны больш ня будуць іх уключаць», — падкрэсьліў Сырскі.
На ўдакладняльнае пытаньне журналіста, ці гэта ўжо немагчыма фізычна, Сырскі адказаў: «Ну я ж не магу вам усё расказваць. Я думаю, што яны ўсьвядомяць, што гэтага ня варта рабіць. Скажам так».
ГЛЯДЗІЦЕ ТАКСАМА:
«Мяркую, Украіна нанесла ўдары па расейскіх рэтрансьлятарах у Беларусі», — КабанчукШто папярэднічала
Пра магчымае разьмяшчэньне апаратуры для кіраваньня расейскімі дронамі на тэрыторыі Беларусі ўкраінскія экспэрты пачалі казаць яшчэ ў канцы 2025 году. Так, 26 сьнежня 2025 году спэцыяліст у вайсковых радыётэхналёгіях Сяргей Бяскрэснаў, вядомы пад пазыўным «Флэш», які ў студзені 2026 году стаў дарадцам міністра абароны Ўкраіны, заявіў, што частка «шахедаў», якія атакуюць Украіну, можа кіравацца з тэрыторыі Беларусі.
У лютым 2026 году Ўладзімір Зяленскі паведаміў пра ліквідацыю часткі рэтрансьлятараў на тэрыторыі Беларусі: «Я ня буду казаць, якім спосабам, але нашыя людзі займаліся тым, каб тры-чатыры рэтрансьлятары ўжо не працавалі на тэрыторыі Беларусі. У нас проста няма іншага выйсьця, інакш будуць далейшыя атакі на нашую зямлю».
Тады ж міністар абароны Ўкраіны Міхаіл Фёдараў і тады ўжо дарадца міністра абароны Сяргей «Флэш» Бяскрэснаў заявілі пра ліквідацыю радыёсеткі Mesh, якую выкарыстоўвалі расейскія «шахеды» каля межаў зь Беларусьсю.
У траўні 2026 году Сяргей «Флэш» выказаў здагадку, што Расея аднавіла працу рэтрансьлятараў у Беларусі, пры гэтым усталяваўшы іх далей ад мяжы.
Пачынаючы з 19 чэрвеня, прэзыдэнт Украіны Зяленскі тройчы публічна абвінаваціў Беларусь у тым, што на яе мяжы з Украінай ёсьць абсталяваньне, якое расейцы выкарыстоўваюць для карэктаваньня атак на Ўкраіну. Палітык заклікаў непрызнанага кіраўніка Беларусі Аляксандра Лукашэнку прыбраць абсталяваньне цягам тыдня, іначай Беларусь чакаюць наступствы.