«Мы верым, што Ўкраіна адаб’е расейскую агрэсію і што разам мы адновім Украіну», — заявіў, адкрываючы Канфэрэнцыю аб аднаўленьні Ўкраіны ў Гданьску, прэм’ер-міністар Польшчы Дональд Туск, якога цытуе Польскае радыё.
Ён адзначыў, што ўкраінскі народ і Эўропу чакаюць вялікія высілкі. Прэмʼер-міністар Польшчы падкрэсьліў, што выбар Гданьску як месца правядзеньня канфэрэнцыі мае сымбалічнае значэньне.
«Я запрасіў вас і нашых сяброў з Украіны менавіта ў гэтае месца, бо яно паказвае, што цуд адбудовы здараецца тады, калі людзі вельмі гэтага хочуць, калі яны ў стане дамагчыся міру, калі яны рашуча робяць добрыя рэчы. Гданьск быў падняты з руін, быў вернуты таксама дух гэтага гораду. І гэтая вялікая праца чакае таксама Ўкраіну».
Прэм’ер-міністар Польшчы Дональд Туск вітае прэмʼер-міністра Ўкраіны Юлію Сьвірыдзенку на Канфэрэнцыі аб аднаўленьні Ўкраіны (URC 2026) у Гданьску, Польшча, 25 чэрвеня 2026 году
Сярод пацьверджаных гасьцей — тры прэзыдэнты дзяржаваў і 12 кіраўнікоў урадаў. У Гданьск прыехалі шэсьць міністраў замежных спраўва, дзясятак міністраў, адказных за эканоміку, гандаль і культуру, і 22 амбасадары. У іх ліку канцлер Нямеччыны Фрыдрых Мэрц, прэзыдэнт Літвы Гітанас Наўседа. Таксама ёсьць кіраўнікі Эўрапейскай камісіі і Эўрапейскай рады, NATO, Эўрапейскага банку рэканструкцыі й разьвіцьця і Ўсясьветнага банку. Сабраліся таксама каля 6000 прадстаўнікоў бізнэсу, банкаўскага сэктару, страхавых кампаніяў і дарадчых фірмаў.
На канфэрэнцыі ў Гданьску
Гаспадаром канфэрэнцыі выступае прэмʼер-міністар Дональд Туск. Украінскую дэлегацыю ўзначальвае прэмʼер-міністар Юлія Сьвірыдзенка. Прэзыдэнт Украіны Ўладзімір Зяленскі не прыехаў на форум у Гданьск на фоне праблемаў у польска-ўкраінскіх адносінах, якія ўзьніклі пасьля прысваеньня аднаму з вайсковых падразьдзелаў імя «Герояў УПА», што выклікала рэзкую рэакцыю ў Польшчы, у прыватнасьці, прэзыдэнт польскай дзяржавы Караль Наўроцкі пазбавіў Зяленскага ордэну Белага арла.
Ціханоўская таксама прымае ўдзел у форуме ў Гданьску
Сьвятлана Ціханоўская знаходзіцца ў Гданьску на запрашэньне арганізатараў Ukraine Recovery Conference — міжнароднай канфэрэнцыі, прысьвечанай аднаўленьню і мадэрнізацыі Ўкраіны.
Сьвятлана Ціханоўская і міністар замежных спраў Прольшчы Радаслаў Сікорскі на Канфэрэнцыі па аднаўленьні Ўкраіны (URC 2026) у Гданьску, Польшча, 25 чэрвеня 2026
Яна ўдзельнічае ў пленарнай сэсіі высокага ўзроўню, а таксама праводзіць сустрэчы з эўрапейскімі і амэрыканскімі палітыкамі і дыпляматамі. У цэнтры размоў — пытаньні бясьпекі, падтрымкі Ўкраіны, роля Беларусі ў рэгіёне, асабліва ў сьвятле апошніх падзей у беларуска-ўкраінскіх адносінах і папярэджаньня, якое прэзыдэнт Зяленскі накіраваў рэжыму Лукашэнкі, паведаміла прэсавая служба Ціханоўскай.