Верхняя палата Кангрэсу ЗША невялікай перавагай галасоў падтрымала законапраект, які патрабуе спыненьня вайны супраць Ірану і абавязвае прэзыдэнта ЗША Дональда Трампа, калі ён вырашыць аднавіць вайну, зьвярнуцца па ўхваленьне ў Кангрэс, піша Радыё Свабодная Эўропа / Радыё Свабода.
Сэнат ухваліў заканадаўчы акт 23 чэрвеня 50 галасамі супраць 48 — да дэмакратаў далучыліся чатыры рэспубліканцы. Акт патрабуе ад Трампа вывесьці амэрыканскія войскі з канфлікту з Іранам, калі на ваенныя дзеяньні ў рэгіёне ня будзе спэцыяльнага дазволу Кангрэсу.
Рэзалюцыю ня будуць падаваць Трампу для зацьвярджэньня яго подпісам, і не адразу было зразумела, як яна паўплывае на канфлікт ЗША з Іранам, якія зараз, падчас спыненьня агню, вядуць перамовы аб мірным пагадненьні .
«З прыняцьцем Сэнатам маёй рэзалюцыі аб паўнамоцтвах у вайне супраць Ірану абедзьве палаты цяпер далі зразумець, што прэзыдэнт ня можа працягваць гэтую вайну з уласнага выбару і павінен спыніць усе ваенныя дзеяньні супраць Ірану», — заявіў пасьля галасаваньня Грэгары Мікс, высокапастаўлены дэмакрат у Камітэце замежных справаў.
«Незалежна ад таго, што кажа прэзыдэнт Трамп, гэты крок абавязковы ў адпаведнасьці з рэзалюцыяй аб ваенных паўнамоцтвах, і я вывучу ўсе законныя шляхі, каб гарантаваць, што выканаўчая ўлада будзе выконваць волю Кангрэсу», — дадаў Мікс.
Цягам апошніх месяцаў сэнатары-дэмакраты ня раз выносілі на разгляд законапраекты аб спыненьні вайны, якія адхіляла рэспубліканская большасьць. Рэспубліканцы маюць нязначную большасьць таксама ў Палаце прадстаўнікоў.
Трамп скрытыкаваў Сэнат за прыняцьце акту аб ваенных паўнамоцтвах
Прэзыдэнт ЗША Дональд Трамп скрытыкаваў Кангрэс за прыняцьце ў значнай ступені сымбалічнага законапраекту «Аб ваенных паўнамоцтвах», распрацаванага дзеля спыненьня вайны ў Іране.
У паведамленьні ў сацыяльных сетках Трамп назваў яго «нясвоечасовым і бессэнсоўным».
«Гэтыя сэнатары толькі ўскладнілі маю працу, але я выканаю яе так ці інакш, бо я заўсёды спраўляюся!» — паскардзіўся Трамп у сваёй сацыяльнай сетцы Truth Social.
Ён напісаў, што менавіта ў той час, калі Іран «гатовы даць нам усё» і «паважае Злучаныя Штаты» і яго самога, «Сэнат ЗША вырашае правесьці няўдала прызначанае і бессэнсоўнае галасаваньне за Закон аб ваенных паўнамоцтвах, заявіўшы спонсару тэрору нумар адзін у сьвеце, што Злучаным Штатам не падабаецца тое, што я раблю для іх, і я павінен спыніцца».
ГЛЯДЗІЦЕ ТАКСАМА:
Хто выйграў ад дамовы ЗША і Ірана і ці ёсьць там месца для Беларусі? Тлумачыць Роза ТурарбекаваГЛЯДЗІЦЕ ТАКСАМА:
ЗША і Іран дамовіліся аб дарожнай мапе для дасягненьня канчатковай дамоўленасьціВайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.