«Удзел беларускіх зборных камандаў і спартоўцаў у мерапрыемствах Міжнароднага календару, у тым ліку Кубках сьвету і Чэмпіянатах сьвету Міжнароднага зьвязу раварыстаў, дазваляецца, а ўсе абмежаваньні, зьвязаныя з пратакольнымі пытаньнямі, сымбалямі і эмблемамі, здымаюцца», — гаворыцца ў афіцыйным паведамленьні.
У траўні Міжнародны алімпійскі камітэт зьняў санкцыі зь беларускіх спартоўцаў. Пасьля гэтага фэдэрацыі асобных відаў спорту пачалі прымаць аналягічныя рашэньні.
7 траўня Міжнародны алімпійскі камітэт заявіў, што «больш не рэкамэндуе якія-небудзь абмежаваньні на ўдзел беларускіх спартоўцаў, уключна з камандамі, у спаборніцтвах, якія праводзяцца міжнароднымі фэдэрацыямі і арганізатарамі міжнародных спартовых мерапрыемстваў».
МАК тады тлумачыў сваё рашэньне тым, што з спартоўцы зь беларускімі пашпартамі ўдзельнічалі ў якасьці індывідуальных нэўтральных спартоўцаў у шматлікіх міжнародных спартовых мерапрыемствах безь якіх-колечы інцыдэнтаў на полі або па-за ім.
Беларусаў ужо дапусьцілі да спаборніцтваў пад дзяржаўным чырвона-зялёным сьцягам і гімнам у спартовай гімнастыцы, плаваньні, сучасным пяціборстве, водных лыжах, тайскім боксе, більярдзе і некалькіх іншых відах. У хакеі санкцыі зьнялі пакуль толькі зь юнацкай і дзявочай зборных краіны.