Яшчэ адзін ператрус у актывіста дыяспары за ўдзел у акцыі да Дня Волі за мяжой
Крыніца «Гомельскай Вясны» з Мазыра паведаміла, што ў прыватным доме сям’і актывістаў супрацоўнікі міліцыі правялі ператрус ды апісалі маёмасьць, якая належыць сужэнцам. Падставай для ператрусу назвалі заведзеную датычна галавы сям’і крымінальную справу за ўдзел у акцыі памяці да Дня Волі 25 сакавіка, якая адбывалася ў адным з гарадоў Польшчы. Падрабязнасьці справы і артыкул, паводле якога яна заведзеная, пакуль невядомыя.
У 2020 годзе сужэнцы бралі ўдзел у пратэстных акцыях, якія адбываліся ў Мазыры. Праз пагрозу завядзеньня крымінальнай справы ў 2021 годзе яны мусілі пакінуць Беларусь.
Зараз сужэнцы знаходзяцца ў адной з краінаў Эўропы. Там яны бяруць актыўны ўдзел у жыцьці дыяспары і беларускіх акцыях, якія ладзяцца ў іхнім горадзе. Адна з такіх акцыяў адбывалася 25 сакавіка да нацыянальнага сьвята — Дня Волі, піша «Вясна».
Праваабаронцам вядома ўжо пра больш чым 30 ператрусаў у сваякоў актывістаў замежжа. Прынамсі частка зь іх зьвязаная з удзелам у сьвяткаваньнях Дня Волі ў Варшаве, Вільні, Беластоку і ЗША, піша «Вясна».
У Беларусі ўпершыню прызналі «экстрэмісцкай» старонку на партале Reddit
Зрабіў гэта суд Чыгуначнага раёну Гомля, які прызнаў «экстрэмісцкімі матэрыяламі» старонку «r/belarusmaidan», піша «Вясна».
Таксама ў «экстрэмісцкі сьпіс» дадалі розныя Telegram-каналы і чаты, старонкі ў TikTok і фэсйбуку, сайт Сайт «dzе.chаt» і іншае.
Рэсурсы, ўнесеныя ў «экстрэмісцкі» сьпіс ад пачатку чэрвеня
- b.e.l.a.r.u.s_ (TikTok)
- belarus__1 (TikTok)
- Come here: образовательные ивенты в Беларуси и не только (Telegram)
- dze.chat-размовы з суседзям (Сайт)
- flagshtok_1_ (TikTok)
- kasia_vadanosava (Instagram)
- Malanka Media (TikTok)
- mara_by_lv (X)
- mguseva_ya (Instagram)
- min55obl / Минская область Новости (Instagram, Threads, TikTok, YouTube)
- ordo_ordinas (старонка недаступная)
- Postim > Беларусь (Одноклассники)
- r/belarusmaidan (Reddit)
- Rita Gatichova (Facebook)
- shauchuk_yuliya_ (Instagram)
- yuri.еxpat (Instagram)
- Беларускі Інстытут Навукі й Мастацтва — БІНіМ (Facebook)
- Вадим Прокопьев (Facebook)
- Второй регион Беларуси (старонка недаступная)
- Дмитрий Щигельский (Facebook)
- Занько Анатоль (Facebook)
- Збройны чын • Zbrojny čyn (Telegram)
- Ольга Карач (Facebook)
- Сергей Маврин (Facebook)
- Стикеры @stickrubot @textmeru_bot (Telegram-стикеры)
- СХОД НЕАБЫЯКАВЫХ Chat (Telegram)
- Фонд хейтеров черта (Telegram)
ГЛЯДЗІЦЕ ТАКСАМА:
Хроніка перасьледу 3 чэрвеня: у Мазыры арыштавалі пэнсіянэра, у Менску асудзілі бізнэсоўцаЯк рэжым Лукашэнкі выкарыстоўвае ярлык «экстрэмізму», каб душыць свабоду слова і змагацца з палітычнымі апанэнтамі
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».