Пра тое, што Латвія ўзмацняе абарону ад дронаў на мяжы з Расеяй і яе саюзьніцай Беларусьсю ў адказ на дроны, якія ляцяць у гэтую краіну NATO, Reuters паведаміў прадстаўнік латвійскай арміі.
Міжнародны саміт па бесьпілётных лятальных апаратах у Рызе, 27 траўня 2026
«Мы плянуем разгарнуць групы перахопнікаў на працягу наступных двух тыдняў», — сказаў агенцтву Reuters Модрыс Кайрыс, кіраўнік Цэнтру кампэтэнцый аўтаномных сыстэм латвійскай арміі, на Міжнародным дронавым саміце ў Латвіі.
Ён паведаміў, што экіпажы будуць складацца з груп да чатырох салдат у транспартным сродку павышанай праходнасьці, яны змогуць зьнішчаць бесьпілётнікі, што набліжаюцца, у радыюсе 10 км. Колькасьць такіх груп, якія будуць патруляваць 400-кілямэтровую мяжу Латвіі з Расеяй і Беларусьсю, засакрэчаная.
«Нам сапраўды трэба павялічыць колькасьць такіх каманд, але нам трэба збалянсаваць гэта зь іншымі патрэбамі арміі. Калі мы разьмясьцім іх на кожным кілямэтры мяжы, мы хутка спалім усе рэсурсы арміі», — сказаў ён.
Дрон Aviation's FX10NG, прадстаўлены падчас міжнароднага саміту па бесьпілётных лятальных апаратах у Рызе, 27 траўня 2026
Выступаючы на вайсковым палігоне, дзе Латвія выпрабоўвае найноўшыя тэхналёгіі бесьпілётнікаў у рамках праграмы NATO, Кайрыс сказаў, што зьнішчэньне вайсковых дронаў у мірны час складанае, бо радарныя зьвесткі ў краінах NATO засакрэчаныя, і абмен імі з вайсковымі, якія адказваюць за зьнішчэньне бесьпілётнікаў, зьяўляецца складаным.
«Недастаткова проста ўзаемадзейнічаць з чым-небудзь, што вы заўважаеце. Нам трэба спачатку ідэнтыфікаваць гэта, каб пазьбегнуць сутыкненьня з цывільным самалётам», — сказаў Кайрыс.
Яшчэ адной праблемай для латвійскіх вайскоўцаў і NATO ў цэлым зьяўляецца ўсё больш шырокае выкарыстаньне малых бесьпілётнікаў, сказаў Кайрыс.
«Яны на некалькі крокаў апярэджваюць сыстэмы барацьбы зь бесьпілётнікамі... Выяўленьне і перахоп малых цэляў — складаная задача, і гэта вялікая праблема, зь якой мы ўсе хутка сутыкнёмся», — сказаў ён.
Бесьпілётны наземны транспартны сродак Roboneers
Чаму гэта важна
Украінскія бесьпілётнікі ў апошнія тыдні зайшлі ў паветраную прастору краін Балтыі, павялічваючы напружанасьць у адносінах з Расеяй у той час, калі пад пытаньнем знаходзяцца абавязацельствы ЗША па калектыўнай бясьпецы NATO.
Украіна, якая нацэльвалася на расейскія парты пагрузкі нафты ў Балтыі, заявіла, што расейскае глушэньне сыгналаў іх бесьпілётнікаў прывяло да іх адхіленьня ад курсу.
7 траўня два такія бесьпілётнікі выбухнулі на пустым нафтасховішчы ў Латвіі. Яшчэ адзін выбухнуў у возеры, пасьля таго, як незаўважаным прыляцеў у краіну.
20 траўня бесьпілётнік, які набліжаўся, прымусіў кіраўніцтва Літвы схавацца пад зямлёй, а 19 траўня вайсковы самалёт NATO зьбіў іншы бесьпілётнік над Эстоніяй.
21 траўня ў Міністэрства замежных справаў Беларусі выклікалі часовага паверанага Літвы ў Беларусі Эрыкаса Вілканецаса і заявілі яму пратэст праз тое, што, маўляў, Літва нічога не зрабіла, каб папярэдзіць пранікненьне на беларускую тэрыторыю ўкраінскага дрону, які першапачаткова накіроўваўся ў бок Расеі. У пратэсьце ішлося пра інцыдэнт, што нібыта меў месца 17 траўня.
У той жа час Беларусь нічога ня робіць з расейскімі дронамі, якія «ўваходзяць» ва Ўкраіну зь беларускай тэрыторыі. Нават наадварот — раней прэзыдэнт Украіны Ўладзімір Зяленскі і прадстаўнікі Міністэрства абароны Ўкраіны заяўлялі, што Беларусь дапамагае Расеі накіроўваць яе дроны на ўкраінскія тэрыторыі.