Як паведаміла агенцтва Bloomberg з спасылкай на свае крыніцы, Вашынгтон аргумэнтаваў сваю просьбу тым, што скасаваньне санкцый на імпарт ключавога пажыўнага рэчыва для глебы можа дапамагчы Беларусі дыстанцыявацца ад Расеі і адчыніць дзьверы для паляпшэньня дачыненьняў зь Менскам.
Агенцтва Reuters не змагло адразу пацьвердзіць гэтую інфармацыю. Дзяржаўны дэпартамэнт ЗША пакуль не адказаў на просьбу аб камэнтары.
ЗША і Эўразьвяз шырокамаштабныя санкцыі супраць Беларусі пасьля таго, як Менск пачаў жорсткія рэпрэсіі супраць пратэстоўцаў пасьля прэзыдэнцкіх выбараў у 2020 годзе.
Абмежаваньні ўзмацнілі пасьля таго, як улады Беларусі падтрымалі агрэсію Расеі 24 лютага 2022 году, дазволіўшы скарыстаць беларускую вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны.
У сьнежні 2025 году ЗША зьмякчылі санкцыі супраць трох беларускіх калійных кампаній пасьля вызваленьня Менскам 250 палітвязьняў у межах дамоўленасьцяў з ЗША. Эўрапейскія санкцыі дзейнічаюць да лютага 2027 году і могуць быць падоўжаны.
ГЛЯДЗІЦЕ ТАКСАМА:
Лукашэнка сказаў, што Беларусь ня мае праблем з рэалізацыяй угнаеньняў. Што ня так з гэтай заявайШто папярэднічала
18 траўня Аляксандар Лукашэнка заявіў, што Беларусь працягвае пастаўляць мінэральныя ўгнаеньня на зьнешнія рынкі насуперак уведзеным міжнародным санкцыям.
«Мы прыставаліся да іх (санкцый. — РС), і ў нас сёньня лішніх мінэральных угнаеньняў няма. Усё, што мы некалі пастаўлялі, і нават больш, — па цэнах, і па аб’ёмах — мы прадаём на міжнародных ранках», — сказаў Лукашэнка на сустрэчы з губэрнатарам Сьвярдлоўскай вобласьці Расеі Дзянісам Пасьлерам і прапанаваў яму пры неабходнасьці дапамагчы зь мінэральнымі ўгнаеньнямі.
У той жа час Лукашэнка з пачатку дыялёгу з ЗША неаднаразова абмяркоўваў тэму скасаваньня санкцый на пастаўкі беларускіх мінэральных угнаеньняў, у тым ліку праз марскі порт у Літве.
У 2022 годзе Літва спыніла транзыт праз сваю тэрыторыю прадукцыі «Беларуськалію», другога па велічыні ў сьвеце вытворцы сельскагаспадарчых угнаеньняў, пасьля таго, як дзяржаўная беларуская кампанія трапіла пад санкцыі ЗША ў адказ на рэпрэсіі, якія адбыліся пасьля сфальшаваных прэзыдэнцкіх выбараў.
Беларусь выкарыстоўвала Клайпедзкі порт Літвы для экспарту калію, які зьяўляецца буйной крыніцай прыбытку для краіны. Угнаеньні куплялі многія дзяржавы сьвету, у тым ліку такія буйныя як Індыя, Кітай і Бразылія.
Эўрапейскі зьвяз увёў санкцыі супраць беларускага калію ў 2022 годзе ў адказ на дапамогу Лукашэнкі Расеі пры ўварваньні ва Ўкраіну.
ЗША скасавалі санкцыі на беларускі калій сёлета ў сакавіку, калі Беларусь вызваліла 250 зьняволеных у рамках пагадненьня, падпісанага пры пасярэдніцтве ЗША. Але эўрапейскія санкцыі дзейнічаюць да лютага 2027 году і могуць быць прадоўжаныя.
У сакавіку пасланец прэзыдэнта ЗША Дональда Трампа ў Беларусі Джон Коўл заявіў літоўскаму нацыянальнаму вяшчальніку LRT, што аднаўленьне экспарту калійных угнаеньняў празь Літву будзе выгадным для Злучаных Штатаў. Літоўскія ўлады доўга адмаўлялі які-кольвечы ціск з боку амэрыканцаў у гэтай справе.
15 траўня стала вядома, што міністар замежных справаў Літвы непублічна прызнаў ціск ЗША ў справе транзыту беларускіх угнаеньняў.
Цяпер экспарт беларускіх угнаеньняў цалкам залежыць ад Расеі і яе магчымасьцяў. У той жа час сама меней два з марскіх партоў, якія працуюць пераважна зь беларускай прадукцыяй істотна пацярпелі ад украінскіх удараў. Апроч таго, праз супольную амэрыкана-ізраільскую апэрацыю ў Іране заблякаваныя адзін з галоўных гандлёвых марскіх шляхоў — Армуская пратока.