ЗША патрабуюць, каб Тэгеран адмовіўся ад усякіх прэтэнзіяў на кампэнсацыі з боку Вашынгтону, перадаў ЗША 400 кіляграмаў узбагачанага ўрану і захаваў дзейным толькі адзін ядзерны комплекс. Акрамя таго, амэрыканскі бок не гатовы размарожваць нават 25% іранскіх актываў і зьвязвае спыненьне баявых дзеяньняў у іншых краінах з хадою перамоваў.
Выкананьне гэтых патрабаваньняў не гарантуе адмовы ЗША і Ізраілю ад новых удараў па Іране, адзначае Fars.
Раней Іран таксама выставіў свае пяць варункаў для аднаўленьня перамоваў. Тэгеран патрабуе спыніць вайну, асабліва ў Лібане, зьняць санкцыі, размарозіць актывы, кампэнсаваць страты і прызнаць сувэрэнітэт Ірану над Армускай пратокай.
У пачатку траўня Іран перадаў ЗША мірны плян з 14 пунктаў. Ён прадугледжваў спыненьне баявых дзеяньняў, гарантыі ненападу, зьняцьце морскай блякады і вывад амэрыканскіх войскаў з рэгіёну.
Паводле зьвестак The Wall Street Journal, галоўным прадметам спрэчкі застаецца ядзерная праграма Ірану. ЗША настойваюць на неадкладных абавязаньнях абмежаваць ядзерную інфраструктуру і запасы ўрану, тады як Тэгеран прапануе абмяркоўваць гэтую тэму асобна цягам 30 дзён.
Прэзыдэнт ЗША Дональд Трамп раней назваў прапановы Ірану непрымальнымі. У Тэгеране на гэта адказалі, што рэакцыя прэзыдэнта ЗША ня мае ніякага значэньня.