Былога ахоўніка Лукашэнкі асудзілі па палітычнай справе
50-гадовага Андрэя Спасава, былога супрацоўніка службы аховы Лукашэнкі асудзілі за «садзейнічаньне экстрэмісцкай дзейнасьці», паведаміла «Наша Ніва».
Дакладны тэрмін пакуль невядомы — у так званым «сьпісе экстрэмістаў» МУС пазначана, што Спасаў ужо «адбывае пакараньне».
ГЛЯДЗІЦЕ ТАКСАМА:
Завочна судзяць палітоляга Балкунца, яму пагражае да 12 гадоў. А ён у роварным туры па ЭўропеПрызналі «экстрэмісцкім» зварот сьвятароў падчас пратэстаў
Гаворка пра «Зварот да хрысьціян Беларусі», які быў апублікаваны на сайце «Pravmir» восеньню 2020-га году.
Такое рашэньне ўхваліў суд Цэнтральнага раёну Менска.
ГЛЯДЗІЦЕ ТАКСАМА:
Хроніка перасьледу 13 траўня: новы завочны прысуд і ператрус у кватэры кандыдата ў Каардынацыйную радуУлады выставілі на продаж арыштаваную кватэру завочна асуджанага
Мова пра кватэру журналіста і праваабаронцы Ўладзімера Хільмановіча.
Аўкцыён па яе продажы мае адбыцца 26 траўня. Двухпакаёвую кватэру плошчай 50 квадратных мэтраў раней ацанілі ў 126 тысяч беларускіх рублёў, піша «Горадзенская Праваабарона».
Раней органы судовага выкананьня выставілі на аўкцыён канфіскаванае лецішча Хільмановіча, якое знаходзіцца ў Мастоўскім раёне. 19 сакавіка прадаць яго не ўдалося. Яшчэ раней чыноўнікі канфіскавалі і ўжо прадалі ўсю бытавую тэхніку сям’і Ўладзімера (лядоўню, тэлевізар, пральную машыну).
19 жніўня 2024 году Горадзенскі абласны суд завочна прызначыў Хільмановічу пазбаўленьне волі тэрмінам на 5 гадоў у папраўчай калёніі ва ўмовах узмоцненага рэжыму і штраф 40 тысяч беларускіх рублёў.
ГЛЯДЗІЦЕ ТАКСАМА:
Хроніка перасьледу 14 траўня: іранскую студэнтку арыштавалі ў Беларусі за камэнтарыЯк рэжым Лукашэнкі выкарыстоўвае ярлык «экстрэмізму», каб душыць свабоду слова і змагацца з палітычнымі апанэнтамі
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».