Цяпер выбары маюць пачацца 11 траўня толькі а 22-й гадзіне паводле менскага часу і працягвацца тыдзень. Паводле камісіі, перанос быў патрэбны, каб завяршыць тэхнічны прагон і «гарантаваць бездакорную працу сыстэмы».
Беларусам для ўдзелу трэба прайсці вэрыфікацыю: сфатаграфавацца і прыкласьці свой пашпарт. Гэтыя зьвесткі паступяць падрадчыку, кампаніі Sumsub.
Якія пытаньні ўзьніклі наконт бясьпекі ўдзельнікаў галасаваньня?
Выданьне «Наша Ніва» зьвярнулася да распрацоўніка сыстэмы галасаваньня Паўла Лібера з пытаньнямі, бо высьветлілася, што заснавальнікі Sumsub вучыліся ў Расеі і тамсама знаходзіліся офісы распрацоўкі Sumsub.
Апроч гэтага, паводле «Нашай Нівы», у пачатку 2026 году кампанія пасьля публікацый на хакерскіх форумах вымушана была прызнаць, што амаль паўтара году — з 2024 году — у яе сыстэме былі трэція асобы, што ў выніку прывяло да кампрамэтацыі даных некаторых карыстальнікаў.
Што на гэта адказалі арганізатары?
Павел Лібер гэтак пракамэнтаваў асноўныя прэтэнзіі да правайдэра:
- Статус кампаніі: Sumsub — ня нішавы гулец, а сусьветны лідэр, што два гады запар пацьвярджае аўтарытэтнае агенцтва Gartner. Сярод 4000 кліентаў сэрвісу — такія гіганты, як Vodafone, Duolingo і TransferGo.
- Бясьпека даных: Кампанія мае найвышэйшыя сэртыфікаты стандартаў бясьпекі і працуе паводле эўрапейскіх патрабаваньняў GDPR. Усе даныя захоўваюцца на сэрвэрах у Нямеччыне. Sumsub таксама супрацоўнічае з Інтэрпалам у пытаньнях дасьледаваньняў і трэнінгаў.
- Інцыдэнты з выцекам інфармацыі: У кампаніі былі два інцыдэнты, зьвязаныя з выцекам даных, якія яна самастойна і наўмысна апублічыла. Першы выпадак тычыўся толькі службы падтрымкі партнэраў і не закрануў біямэтрыю ці пашпарты. Другі быў выкліканы памылкай самога партнэра, які выклаў ключ доступу ў публічную прастору, што не зьяўляецца хібай сыстэмы Sumsub.
- Паходжаньне ўласьнікаў: Заснавальнікі кампаніі нарадзіліся ў Расеі і маюць ізраільскія пашпарты. Яны не жывуць у РФ больш за 7 гадоў і пасьля пачатку поўнамаштабнай вайны цалкам адмовіліся ад выкарыстаньня расійскага і беларускага софту.
Што такое Каардынацыйная рада?
У Каардынацыйную раду праз онлайн-галасаваньне абіраюць 80 асобаў. КР мае выконваць функцыі альтэрнатыўнага беларускага парлямэнту. Створаны ў 2020 годзе орган павінен быў дапамагчы Лукашэнку перадаць уладу апазыцыі. Цяпер у ім не засталося ніводнага чалавека, які жыве ў Беларусі.