За дзень да параду 9 траўня дроны атакавалі Расею. 13 аэрапортаў спынілі працу
Пажар у Нара-Фамінску Маскоўскай вобласьці пасьля меркаванай атакі ўкраінскіх дронаў на вытворчы і лягістычны цэнтар Міністэрства абароны Расеі. 7 траўня 2026 году
На фоне абвешчанага на 8 і 9 траўня Міністэрствам абароны Расеі часовага спыненьня агню ў вайне супраць Украіны паведамляюць аб атацы бесьпілётнікаў на Маскву.
Мэр Масквы Сяргей Сабянін напісаў у сацыяльных сетках пра меркаванае зьнішчэньне як мінімум 25 бесьпілётнікаў, якія ляцелі на сталіцу Расеі. Паведамленьняў аб пашкоджаньнях ці ахвярах няма, піша Ўкраінская служба Радыё Свабода.
Губэрнатар Яраслаўскай вобласьці Расеі Міхаіл Еўраеў заявіў, што мінулай ноччу на падыходзе да Яраслаўля сілы супрацьпаветранай абароны і радыёэлектроннай барацьбы адбілі атаку ўкраінскіх бесьпілётнікаў. Ахвяраў не было. Ён не паведаміў пра пашкоджаньні.
Telegram-канал ASTRA, які геалякуе відэа відавочцаў, піша, што пасьля дронавай атакі на Яраслаўль у ноч на 8 траўня загарэўся мясцовы нафтаперапрацоўчы завод. Украінскія бесьпілётнікі раней ня раз атакавалі гэты завод.
OSINT-аналіз ASTRA таксама паказвае пажар у Растове-на-Доне паблізу лякафарбавага заводу «Эмпилс» і філіялу навукова-тэхнічнага цэнтру «Радар».
Жыхары Растова-на-Доне паведамілі пра шматлікія выбухі і пажар. Згодна з аналізам відэазапісаў відавочцаў, праведзеным ASTRA, пажар узьнік у раёне Заходняга прамысловага комплексу, дзе шмат прадпрыемстваў розных галін прамысловасьці, у тым ліку завод «Эмпилс», атакаваны раней — у студзені 2026 году, і філіял НТЦ «Радар».
Губэрнатар Растоўскай вобласьці Юрый Сьлюсар заявіў, што ў выніку падзеньня абломкаў БПЛА назіраюцца разбурэньні ў гарадах Таганрозе, Батайску, Растове-на-Доне і ў Мясьніцкім раёне.
У той жа час у Кіеве заявілі, што сілы супрацьпаветранай абароны 8 траўня зьнішчылі 56 расейскіх бесьпілётнікаў, якія атакавалі Ўкраіну.
У Расеі 13 аэрапортаў прыпынілі працу пасьля дронавай атакі
Як паведамляе Расейская служба Радыё Свабода, Міністэрства транспарту Расеі заявіла, што з прычыны пацэльваньня бесьпілётнікаў у адміністрацыйны будынак аэранавігацыі ў Растове-на-Доне ў ноч на 8 траўня прыпынілі працу 13 аэрапортаў на поўдні Расеі.
«Праца рэгіянальнага цэнтру ў Растове-на-Доне, які кіруе паветраным рухам на поўдні Расеі, скарэктавалі праз пацэльваньне ўкраінскіх БПЛА ў адміністрацыйны будынак філіялу «Аэранавігацыі Поўдня Расеі», — гаворыцца ў паведамленьні.
Прыпыненая праца аэрапортаў у Астрахані, Уладзікаўказе, Валгаградзе, Геленджыку, Грозным, Краснадары, Махачкале, Магасе, Мінэральных Водах, Нальчыку, Сочы, Стаўрапалі і Элісьце.
У гэтых аэрапортах затрымана і скасавана больш за 80 рэйсаў, у чаканьні застаюцца 14 тысяч пасажыраў.
Чаму Ўкраіна атакуе НПЗ і вайсковыя аб’екты ў Расеі
Пасьля пачатку поўнамаштабнага ўварваньня Расеі ва Ўкраіну авіяўдары наносіліся па розных аб’ектах на тэрыторыі Расеі.
Нафтаперапрацоўчыя заводы (НПЗ) Расеі часьцей за ўсё былі цэлямі паветраных атак у 2024 і 2025 гадах.
Генэральны штаб Узброеных сілаў Украіны звычайна пацьвярджае большасьць атак, заяўляючы, што Армія абароны Ўкраіны «сыстэматычна рэалізуе захады, накіраваныя на зьніжэньне баявога патэнцыялу расейскіх акупацыйных войскаў, а таксама на прымушэньне Расейскай Фэдэрацыі спыніць узброеную агрэсію супраць Украіны».
Расея не прыняла ўкраінскую прапанову спыніць агонь з 6 траўня, Міністэрства абароны Расеі паведаміла ў аднабаковым парадку пра спыненьне агню з свайго боку толькі на сьвяткаваньне Дня перамогі 8 і 9 траўня.
Расея пагражае Ўкраіне ў выпадку парушэньня гэтага перамірʼя «адэкватным адказам», а ў выпадку атак на парад — масаваным ударам па цэнтры Кіева.
Зяленскі прапаноўваў рэжым цішыні з 6 траўня, але Расея яго адразу парушыла, у тым ліку ўдарамі па гарадах Украіны.
Прэзыдэнт Украіны Ўладзімір Зяленскі заявіў увечары 7 траўня, што не рэкамэндуе лідэрам замежных дзяржаваў наведваць парад у Маскве 9 траўня.
Аляксандар Лукашэнка мае быць адным з чатырох лідэраў міжнародна прызнаных дзяржаваў на сьвяткаваньнях у Маскве. Акрамя яго, там чакаюцца прэзыдэнт Лаосу Тхонглун Сісуліт, султан Малайзіі Ібрагім Ісмаіл, а таксама прэм’ер-міністар Славаччыны Робэрт Фіца, які пры гэтым не зьбіраецца на парад.