Пасьля масавай ліквідацыі паўстала пытаньне: колькі супольнасьцяў уніятаў засталося ў Беларусі і дзе? Сайт katolik.life паспрабаваў сабраць іх.
Ува ўсёй тэрытарыяльна вялікай Пінскай дыяцэзіі засталася толькі адна грэка-каталіцкая парафія — у Гомлі.
Агулам, як вынікае з Адзінага дзяржаўнага рэгістру, у які павінны быць унесены ўсе рэлігійныя арганізацыі, 4 супольнасьці дзейнічаюць у Менску, 2 — у Віцебску, па адной у Маладэчне, Полацку, Воршы, Магілёве й Гомлі.
Аднак, паводле інфармацыі Свабоды, парафія ў Воршы рэгістрацыю не прайшла.
Таксама вядома, што працягвае дзейнасьць парафія ў Горадні, таксама ёсьць і ў Лідзе, хоць зьвестак пра гэтыя арганізацыі Адзіны дзяржаўны рэгістар не выдае.
Цяпер у Беларусі засталося 12 грэка-каталіцкіх парафіяў.
Сярод іх гомельская парафія Трох Сьвяціцеляў, якая была зарэгістраваная ў Беларусі самай першай. Паводле рэестру, гэта адбылося ў сьнежні 1991 году. Супольнасьць нешматлікая і, як у бальшыні іншых гарадоў, ня мае свайго храму. Службы праходзяць у гомельскім касьцёле звычайна двойчы на месяц, прыяжджае служыць сьвятар з Магілёва.