Улады Ўкраіны заяўляюць, што нафтаправод быў пашкоджаны ў выніку расейскіх бамбардзіровак. Улады Вугоршчыны абвінавачвалі Кіеў у тым, што той наўмысна зацягвае рамонт, каб паўплываць на перадвыбарчую кампанію, якая праходзіла ў Вугоршчыне. Вугорскі прэм’ер Віктар Орбан і Зяленскі абмяняліся шэрагам рэзкіх заяваў. Вугоршчына ў ЭЗ заблякавала ўхваленьне 20-га пакета санкцыяў у дачыненьні да Расеі і выдзяленьне Ўкраіне ўзгодненага раней крэдыту ў 90 мільярдаў эўра.
ГЛЯДЗІЦЕ ТАКСАМА:
Орбан страціў уладу пасьля 16 гадоў: вугорцы масава падтрымалі ягонага праэўрапейскага суперніка Мадзяра12 красавіка ў Вугоршчыне прайшлі выбары, у выніку якіх партыя Орбана пацярпела паразу.
Як заявіў Зяленскі сёньня, выступаючы ў Бэрліне, нафтаправод будзе адрамантаваны да канца красавіка — ня цалкам, але ў дастатковай меры для аднаўленьня працы. Зяленскі падкрэсьліў, што Украіна і раней называла такія тэрміны. 20 сакавіка ўлады краіны заяўлялі, што рамонт можа скончыцца праз шэсьць тыдняў. Сам Зяленскі пры гэтым называў іншыя тэрміны — да канца вясны.
Зяленскі адмаўляе, што Ўкраіна знарок спыніла прапампоўку нафты, каб паўплываць на Вугоршчыну і Славаччыну. У той жа час, ён неаднаразова заклікаў гэтыя краіны адмовіцца ад закупак нафты ў Расеі.
Пераможца выбараў у Вугоршчыне, імаверны будучы прэмʼер Пэтэр Мадзяр заявіў напярэдадні, што ў найбліжэйшай будучыні краіна ня зможа адмовіцца ад расейскай нафты. Ён пры гэтым даў зразумець, што разблакуе выдзяленьне крэдыту Ўкраіне. Зяленскі пацьвердзіў, што гатовы сустрэцца з Мадзярам у любы час.
У Бэрліне Зяленскі правёў перамовы з канцлерам Нямеччыны Фрыдрыхам Мэрцам. Заплянаваны таксама яго візыт у Нарвэгію.