У Адэсе колькасьць ахвяр расейскага ўдару павялічылася да 18 чалавек, зь якіх трое загінулі, паведаміў кіраўнік абласной ваеннай адміністрацыі Алег Кіпер.
Паводле яго, 13 з 15 параненых, у тым ліку 7-месячны хлопчык, 2-гадовая дзяўчынка і цяжарная жанчына, шпіталізаваныя з асколачнымі раненьнямі, апёкамі, траўмамі і атручваньнямі прадуктамі гарэньня — некаторыя з людзей знаходзяцца ў цяжкім стане. Лекары ацэньваюць стан дзяцей як сярэдняй цяжкасьці.
Кіпер дадаў, што загінулі 53-гадовая жанчына, 30-гадовая жанчына і яе маленькая дачка, якой было 2 гады.
Уначы Адэса зноў пацярпела ад масіраванага нападу з боку Расеі. Кіраўнік ваеннай адміністрацыі гораду Сяргей Лысак паведаміў, што пасьля расейскага нападу ў адным з раёнаў горада зафіксаваныя сур’ёзныя пашкоджаньні з пятага па трэці паверхі шматпавярховага будынка. Пад заваламі могуць знаходзіцца людзі.