За апошнія тыдні краіны Пэрсыдзкай затокі сутыкнуліся зь неаднаразовымі абстрэламі бесьпілётнікаў і ракетамі з боку Ірану ў адказ на ўдары ЗША і Ізраілю, якія пачаліся ў канцы лютага, піша AFP.
Іран нанёс удары па энэргетычнай і іншай прамысловай інфраструктуры ў багатых на нафту краінах Пэрсыдзкай затокі, абвінавачваючы сваіх суседзяў у тым, што яны дазволілі амэрыканскім войскам праводзіць атакі з іх тэрыторыі.
Дзяржавы гэтага рэгіёну рашуча адкідаюць гэтыя абвінавачваньні з боку Тэгерану.
У Абу-Дабі заявілі ў нядзелю, што яны змагаюцца з пажарамі на нафтахімічным заводзе ў прамысловым горадзе Рувайс на паўночна-заходнім узьбярэжжы ААЭ.
«Улады рэагуюць на шматлікія пажары на нафтахімічным заводзе ў Баружы, выкліканыя падзеньнем абломкаў пасьля паспяховага перахопу сыстэмамі супрацьпаветранай абароны», — паведаміла прэс-служба гэтай краіны Пэрсыдзкай затокі.
«Апэрацыі на аб’екце былі неадкладна прыпыненыя, пакуль ацэньваецца шкода. Паведамленьняў пра пацярпелых няма», — дадалі ў паведамленьні пасьля таго, як Міністэрства абароны Аб’яднаных Арабскіх Эміратаў раней заявіла, што рэагуе на ракетныя атакі і атакі бесьпілётнікаў.
Раней іранская армія заявіла, што нацэльваецца на «алюмініевыя прадпрыемствы» ў ААЭ і вайсковую інфраструктуру ЗША ў Кувэйце. Пра гэта паведаміла ў суботу афіцыйнае інфармацыйнае агенцтва IRNA.
ГЛЯДЗІЦЕ ТАКСАМА:
Аэрапорт Дубаю пацярпеў ад удару бесьпілётніка, на нейкі час ён спыняў працуІсламская рэспубліка неаднаразова пагражала цывільнай інфраструктуры ў краінах Пэрсыдзкай затокі, бо амэрыкана-ізраільскія напады ў Іране таксама закранулі цэлі, якія маюць ключавое значэньне для эканомікі Ісламскай рэспублікі.
У суботу ў выніку ўдару па нафтахімічным цэнтры на паўднёвым захадзе Ірану загінулі пяць чалавек, паведаміў намесьнік губэрнатара правінцыі Хузэстан.
У нядзелю ў Бахрэйне дзяржаўная энэргетычная кампанія каралеўства заявіла, што ў выніку нападу іранскага бесьпілётніка пачаўся пажар у рэзэрвуары, які пазьней пагасілі.
ГЛЯДЗІЦЕ ТАКСАМА:
У Саудаўскай Арабіі ў выніку іранскіх абстрэлаў параненыя вайскоўцы ЗША. Хусіты ўступілі ў вайну на баку ІрануРаней Міністэрства электраэнэргіі і водных рэсурсаў Кувэйту заявіла, што дзьве кувэйцкія электрастанцыі і апрасьняльныя станцыі былі пашкоджаныя ў выніку нападу бесьпілётніка з Ірану, што прывяло да «значнай матэрыяльнай шкоды і спыненьня працы двух электрагенэравальных блёкаў».
Такім чынам, пагрозы Тэгерану распаўсюдзіліся й на апрасьняльныя станцыі, ад якіх пустэльныя краіны Пэрсыдзкай затокі ў значнай ступені залежаць у забесьпячэньні вадой.