Пастановай ураду Беларусі «Аб сыстэме электроннай чаргі транспартных сродкаў у пунктах пропуску і запэўненьні памежнай бясьпекі», апублікаванай 1 красавіка на Нацыянальным праўным партале, уводзяць плату за рэзэрваваньне даты ўезду на пункт пропуску, каб выехаць з краіны:
«31,5 базавай велічыні, у тым ліку падатак на даданую вартасьць, за кожны грузавы транспартны сродак пры рэзэрваваньні даты ўезду ў аўтадарожны пункт пропуску празь дзяржаўную мяжу Рэспублікі Беларусь».
Такім чынам, транспартныя фірмы павінны заплаціць 1417,5 беларускага рубля за адзін транспартны сродак, калі хочуць больш хуткага і камфортнага выезду зь Беларусі.
Гэтыя сродкі ўрад будзе разьмяркоўваць паміж апэратарамі зонаў чаканьня «ў мэтах забесьпячэньня функцыянаваньня сыстэмы электроннай чаргі ў зонах чаканьня — у памеры 60 працэнтаў ад памеру платы». Дзяржаўнаму памежнаму камітэту дзеля «ўдасканаленьня матэрыяльна-тэхнічнага забеспячэньня» пойдзе 10% платы.
Раней урад увёў аналягічную плату зь легкавых аутамабіляў. Цяпер яна складае 697,5 рубля.