Нагодай стаў яго адказ на пытаньне карыстальніцы зь нікам Nšo-či, ці варта «весьці бізнэс з дыктатарам»? Коўл параіў ёй задаць гэтае пытаньне 500 былым палітвязьням, якія выйшлі на волю дзякуючы перамовам ЗША з Лукашэнкам:
«Спытайцеся ў любога з тых 500 былых вязьняў, якіх мы вызвалілі, так, былых!».
Сярод тых, хто падтрымаў Коўла, былыя палітвязьні. Юрась Зянковіч напісаў, што сам зьяўляецца адным з вызваленых:
«Гэта трэба рабіць, і ўсіх трэба вызваліць. Але яшчэ важней — зьнішчыць саму сыстэму закладнікаў. Інакш гэта стане бясконцым працэсам».
Адзін з камэнтатараў, аднак, адзначыў, што многія былыя вязьні не падзяляюць аптымізму:
«Калі іх сапраўды спытаць, то ў іх няма адказу. Яны расчараваныя. За што яны страцілі гады свайго жыцця? Мы змагаліся, мы зрабілі свой выбар, мы заплацілі. А вы зьнішчылі вынік, бо аддалі шмат за мінімум. Гэта ня тое, як беларусы могуць атрымаць сваю свабоду».
Крытыкі лічаць, што дамоўленасьці з Лукашэнкам могуць замацоўваць практыку «гандлю людзьмі», калі ўлады выкарыстоўваюць палітвязьняў як інструмэнт перамоваў.
Разам з тым частка карыстальнікаў шчыра дзякуе амэрыканскаму боку. Некаторыя называюць дзеяньні ЗША «лепшым, што адбылося ў беларускай палітыцы за апошнія гады», іншыя дзякуюць асабіста Коўлу і Дональду Трампу за «выратаваныя жыцьці».
Частка рэакцыяў — варожая. Некаторыя карыстальнікі абвінавачваюць Коўла ў тым, што за «гуманітарнай рыторыкай» стаіць супрацоўніцтва з аўтарытарнымі рэжымамі:
«Сьвет не настолькі наіўны, каб не разумець сапраўдныя прычыны вашай „дружбы“ з дыктатарамі».
Асобна гучаць заклікі не абмяжоўвацца агульнымі лічбамі. Блогер Антон Матолька папрасіў дапамогі для канкрэтнага вязьня:
«Калі ласка, уратуйце Сьцяпана Латыпава...»
Сустракаюцца і даволі радыкальныя камэнтары — ад заклікаў да сілавога вырашэньня праблемы да іроніі:
«Калі б Лукашэнку прыбралі, усе былі б свабодныя, а ня толькі 500».
Іншыя адзначаюць, што перамовы ня спыняць «кола рэпрэсіяў», якое будзе паўтарацца.
Частка карыстальнікаў уздымае пытаньне пра цану такіх дамоўленасьцяў. У прыватнасьці, згадваецца зьмякчэньне санкцыяў і магчымыя наступствы — у тым ліку падтрымка беларускай вайсковай прамысловасьці, якая, паводле крытыкаў, зьвязаная з вайной Расеі супраць Украіны.
Джон Коўл сочыць за камэнтарамі ў сацсетцы Х і рэагуе на іх. Так, днямі, у адказ на допіс журналісткі, экс-палітзьняволенай Кацярыны Андрэевай, якая папрасіла дапамагчы вызваліць яе мужа — журналіста Ігара Ільяша і іншых людзей, якія застаюцца за кратамі праз палітычныя матывы, ён адрэагаваў рэплікай: «Працуем для гэтай мэты».