Як адзначаецца ў паведамленьні міністэрства, асноўная мэта вучэньняў — «праверка ўзаемадзеяньня міліцыі з усімі зацікаўленымі пры працы ў асаблівых умовах».
«З мэтай раптоўнай праверкі міністар упершыню ўхваліў рашэньне аб унясеньні зьменаў у хаду вучэньняў. У прыватнасьці, мова ідзе аб пазаплянавых зыходных, падняцьці па трывозе спэцпадразьдзелаў зь іншых рэгіёнаў. Другі этап прадугледжвае практычны складнік», — паведамілі ў МУС.
На вучэньні прыехалі міністар Іван Кубракоў і яго намесьнік — камандуючы ўнутранымі войскамі Мікалай Карпянкоў. Першая фаза раптоўнай праверкі праходзіць на базе абласнога ўпраўленьня ўнутраных справаў. Удзельнікі абмеркавалі «тэарэтычныя аспэкты гарантаваньня бясьпекі ў выпадку рэзкай зьмены апэратыўнай абстаноўкі».
У МУС адзначылі, што ўдасканалілі альгарытм прыкрыцьця дзяржаўнай мяжы, стварэньня рэзэрваў, іх сучаснай перадысьлякацыі пры патрэбе, а таксама змадэлявалі розныя варыянты разьвіцьця падзеяў, вызначылі дзеяньні міліцыянтаў і іншых сілаў у канкрэтных сытуацыях.
Нядаўна ў Беларусі завяршылася раптоўная праверка Ўзброеных сілаў.