Расейскія войскі раніцай 21 сакавіка атакавалі энэргаабʼекты, праз што большая частка Чарнігаўскай вобласьці Ўкраіны засталася без электрычнасьці.
Пра гэта паведаміў кіраўнік абласной ваеннай адміністрацыі Вячаслаў Чаўс.
Кіраўнік гораду Славуціч у Кіеўскай вобласьці Юрый Фомічаў напісаў, што горад цалкам абясточаны, а абʼекты крытычнай інфраструктуры пераведзены на рэзэрвовыя крыніцы сілкаваньня.
Расейскія войскі рэгулярна атакуюць украінскія гарады і цывільную інфраструктуру, у тым ліку энэргаабʼекты ва ўсіх рэгіёнах Украіны. Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар, каб пазбавіць людзей электраэнэргіі, цяпла, водазабесьпячэньня, сувязі, мэдычнай дапамогі і іншых неабходных умоў для жыцьця.
Кіраўніцтва Расеі пры гэтым заяўляе, што расейскія войскі бʼюць па вайсковых абʼектах.
ГЛЯДЗІЦЕ ТАКСАМА: У Малдове праблемы з водазабесьпячэньнем. У раку Днестар пасьля расейскага ўдару па Ўкраіне вылілася нафта ГЛЯДЗІЦЕ ТАКСАМА: Расея не спыняе ўдары па Ўкраіне: у Адэсе пацярпеў жылы сэктар, на Валыні — энэргетыка, у Львове — будынак СБУ