Як паведаміла выданьне LRT, суд прызнаў яго рэцыдывістам. Абвінавачваньне патлумачыла такое пакараньне тым, што Антанас Кандротас ужо пяць разоў быў суджаны і раней сядзеў у турме.
Згодна з рашэньнем суду, Кандротас павінен выплаціць адну тысячу эўра кампэнсацыі маральнай шкоды палітыку, супраць якога выказваўся.
Пасьля абвяшчэньня выраку Антанас Кандротас заявіў, што ў Літве «няма свабоды слова». Ён паведаміў, што будзе абскарджваць прысуд, бо лічыць яго несправядлівым і не прызнае сваёй віны.
«Я сам ня верыў, што дадуць год рэальнага пазбаўленьня волі, бо, на маю думку, гэта па-за межамі разуменьня. Відавочна, што ЛГБТ-супольнасьць зараз настолькі разьюшаная, што тых, хто іх крытыкуе, адпраўляюць у турму. Калі так будзе працягвацца, то мы атрымаем расстрэльныя прысуды», — сказаў асуджаны.
ГЛЯДЗІЦЕ ТАКСАМА: Палітык, які ня браў удзел у выбарах, шматкроць суджаны. Што вядома пра літоўца з прапагандысцкіх перадачаў Беларускай тэлевізііЧым вядомы Кандротас?
Антанаса Кандротаса ледзь ня кожны тыдзень запрашалі на перадачы Горадзенскай абласной тэлекампаніі, дзе ён выказваўся супраць палітыкі Літвы датычна Беларусі, а таксама крытыкаваў стварэньне новага вайсковага палігону ля мяжы зь Беларусьсю ў раёне Сувальскага калідору і рост вайсковых выдаткаў.
Кандротаса шматкроць судзілі за фінансавыя махлярствы, за беспарадкі каля парлямэнту, ён сядзеў у турме, але быў датэрмінова вызвалены ў 2025 годзе.
У 2021 годзе яго заўважылі за стырном аўтамабіля з чырвонымі нумарнымі знакамі — такія знакі маюць машыны дыпляматычных прадстаўніцтваў у Літве. Згодна з інфармацыяй літоўскіх мэдыя, аўтамабіль мог належаць амбасадзе Беларусі ў Літве. Але Антанас Кандротас гэта зьняпраўджваў, сьцьвярджаў, што машына належыць Мальтыйскаму ордэну, сябрам якога ён нібыта быў. Мальтыйскі ордэн гэта адрынуў і афіцыйна ад Кандротаса адмежаваўся.
У студзені 2022 году Антанас Кандротас наведваў Беларусь разам зь іншымі ўдзельнікамі антыэўрапейскай партыі «Зара справядлівасьці» (яе ачольваў Альгірдас Паляцкіс, асуджаны за шпіянаж на карысьць Расеі) і ўдзельнічаў у сустрэчы зь міністрам замежных справаў Уладзімерам Макеем. Яны называлі сябе прадстаўнікамі «літоўскай грамадзянскай супольнасьці» і на сустрэчах абураліся палітыкай ураду Літвы ў дачыненьні да Беларусі пасьля прымусовай пасадкі самалёту Ryanair з Раманам Пратасевічам на борце, прэзыдэнцкіх выбараў 2020 году і мігранцкага крызісу, які ўлады Беларусі распачалі ў 2021 годзе супраць сваіх эўрапейскіх суседзяў.
У жніўні 2025 году Кандротас актыўна ўдзельнічаў у мітынгу супраць прысутнасьці Сьвятланы Ціханоўскай у Літве, які арганізаваў крайне правы дэпутат Вітаўтас Сініца.