Улады Львоўскай вобласьці паведамілі, што ў ноч на 19 сакавіка расейскі дрон пацэліў у будынак абласнога ўпраўленьня Службы бясьпекі Ўкраіны.
«Ёсьць руйнаваньні. Папярэдне без пацярпелых», — паінфармаваў кіраўнік рэгіёну Максім Казіцкі.
Паводле яго, у Львове знаходзяць аскепкі зьбітых расейскіх бесьпілётнікаў.
У Адэсе трое параненых
Паводле кіраўніка Адэскай вобласьці Алега Кіпера, у выніку начной расейскай атакі пашкоджаны жылы сэктар у трох раёнах абласнога цэнтру. На месцах падзеньня бесьпілётнікаў — руйнаваньні і пажары.
«Пацярпелі чатыры чалавекі, з заблякаваных кватэраў уратавалі траіх жыхароў», — паведаміў ён.
Адзін з расейскіх дронаў лучыў у шматпавярховы дом і часткова зруйнаваў некалькі кватэраў, фасад, вокны. Пашкоджаньні атрымала камунальнае прадпрыемства і яго абсталяваньне.
На Валыні праз расейскія ўдары праблемы з вадой і цяплом
Мэр гораду Новавалынску (Валынская вобласьць) Барыс Карпус паведаміў аб расейскай атацы на энэргетычную інфраструктуру гораду.
Паводле яго, частка жыхароў засталася безь сьвятла, пачаліся перабоі ў забесьпячэньні вадой.
«Пашкоджаньні вельмі сур’ёзныя», — заявіў Барыс Карпус.
Мэр гораду дадаў, што для аднаўленьня забесьпячэньня вадой выкарыстоўваюць генэратары, частка кацельняў будзе працаваць на мінімальным узроўні.
Расейскія войскі сыстэмна атакуюць жылыя кварталы і цывільную інфраструктуру з розных відаў узбраеньня — ударнымі дронамі, ракетамі, кіраванымі авіябомбамі.
Кіраўніцтва Расеі зьняпраўджвае тое, што расейская армія наносіць мэтанакіраваныя ўдары па цывільнай інфраструктуры і мірным насельніцтве.
Украінская ўлада і міжнародныя арганізацыі кваліфікуюць гэтыя ўдары як ваенныя злачынствы Расейскай Фэдэрацыі і пераконваюць, што яны маюць мэтанакіраваны характар.
