Як паведаміла Расейская служба Радыё Свабода з спасылкай на расейскія агенцтвы «Інтэрфакс» і РБК, законапраект падрыхтавала Міністэрства абароны.
У выніку яго ўхваленьня, як сьцьвярджаюць крыніцы інфармацыйных агенцтваў, дзеяньне закону будзе распаўсюджвацца на дзеяньні судоў, у якіх Расея ня ўдзельнічае, і кампэтэнцыя якіх не заснаваная на міжнародным дагаворы з Расеяй або на рэзалюцыі Рады бясьпекі ААН.
Крыніца агенцтва «Інтэрфакс» адзначыла, што праект прадугледжвае зьмены ў фэдэральныя законы «Аб грамадзянстве» і «Аб абароне». Зьмены прадугледжваюць, у тым ліку, «магчымае экстэрытарыяльнае выкарыстаньне паводле рашэньня прэзыдэнта Расейскай Фэдэрацыі фарміраваньняў Узброеных сіл для абароны грамадзян Расейскай Фэдэрацыі».
Расейская служба Радыё Свабода нагадала, што ў канцы сьнежня 2025 году Ўладзімір Пуцін падпісаў закон, які прадугледжвае адмову Расеі ад выкананьня пастаноў замежных крымінальных судоў, а таксама міжнародных судовых органаў, чыя кампэтэнцыя не заснавана на дагаворы з краінай або рэзалюцыі ААН.
Кіраўнік праўленьня Асацыяцыі юрыстаў Расеі Ўладзімір Грузьдзеў удакладняў, што гэты закон будуць выкарыстоўваць, напрыклад, датычна да выракаў Міжнароднага крымінальнага суда і магчымага трыбуналу па Ўкраіне.
Раней Міжнародны крымінальны суд выдаў ордэры на арышт прэзыдэнта Ўладзіміра Пуціна і пяці іншых расейцаў за незаконны вываз дзяцей з акупаваных тэрыторый Украіны.
ГЛЯДЗІЦЕ ТАКСАМА: У ААН прызналі перамяшчэньне ўкраінскіх дзяцей у Расею і Беларусь злачынствам супраць чалавечнасьці