Як паведаміла агенцтва AFP, раніцай 2 сакавіка ў Бэйруце адбылося некалькі гучных выбухаў.
Ізраільскія ўдары адбыліся пасьля запуску ракет і бесьпілётнікаў зь Лібану. Гэта быў першы напад на Ізраіль, за які адказнасьць узяла «Хэзбала» пасьля пагадненьня аб спыненьні агню ў лістападзе 2024 году, што адбылося больш, чым праз год вайны паміж імі.
У заяве адзначаецца, што ізраільскія войскі «дакладна ўдарылі» па старшых чальцах «Хэзбалы» ў раёне Бэйрута і на поўдні.
Дзяржаўнае нацыянальнае інфармацыйнае агенцтва Лібану (NNA) паведаміла пра ізраільскія ўдары па ўсёй краіне, у тым ліку ў паўднёвых прыгарадах Бейруту, дзе ўладу ўтрымліваюць чальца «Хэзбалы».
Ізраіль заклікаў жыхароў прыблізна 50 населеных пунктаў на поўдні і ўсходзе Лівана да эвакуацыі.
Перад гэтым «Хэзбала» ўзяла на сябе адказнасьць за ўдар ракетамі і дронамі па Ізраілі, які, паводле прадстаўнікоў арганізацыі, быў адплатай за забойства вярхоўнага лідэра Ірана аяталы Алі Хамэнэі падчас хвалі амэрыкана-ізраільскіх удараў па Тэгэране.
Прэм’ер-міністар Лібану Наваф Салам, урад якога выступае за раззбраеньне «Хэзбалы», назваў ракетны абстрэл з боку Ізраіля «безадказным».
Паводле яго, такія дзеяньні «ставяць пад пагрозу бясьпеку Лібану і даюць Ізраілю падставу для працягу нападаў на яго».
Кіраўнік лібанскага ўраду заявіў аб скліканьні экстранай нарады, «каб абмеркаваць падзеі... і прыняць неабходныя меры».
Ліванскае агенцтва NNA паведаміла аб «значным перамяшчэньні» насельніцтва з паўднёвых прыгарадаў Бейруту і з поўдня краіны, недалёка ад мяжы з Ізраілем.
На відэа ў мясцовых СМІ дарогі запоўненыя аўтамабілямі, якія выяжджаюць з небясьпечнага раёну. Далей на поўдзень, на ўзьбярэжжы Міжземнага мора, утварыліся велічэзныя чэргі з аўтамабіляў.
Лібанскія ўлады неаднаразова заяўлялі, што не жадаюць уцягваць сваю краіну ў канфлікт у рэгіёне, які пачаўся пасьля масіраванага абстрэлу Ірану з боку ЗША і Ізраілю.
Ваенная апэрацыя Ізраілю і ЗША супраць Ірана пачалася 28 лютага. У адказ Іран пачаў абстрэльваць ня толькі Ізраіль, але і іншыя краіны рэгіёну. Тэгеран заявіў, што лічыць законнымі вайсковымі цэлямі ізраільскія аб’екты і амэрыканскія вайсковыя базы.