Міністэрства працы і сацыяльнай абароны Беларусі абвясьціла пра запуск экспэрымэнту супольна з сыстэмай аховы здароўя па ўкараненьні электронных бальнічных.
На першым этапе экспэрымэнт будзе тычыцца толькі бальнічных лістоў па цяжарнасьці і родах.
«У залежнасьці ад вынікаў гэтага экспэрымэнту мы прымем рашэньне аб далейшай рэалізацыі гэтай практыкі на ўзроўні ўсёй краіны», — паведаміў міністар працы і сацыяльнай абароны Андрэй Лабовіч у час выніковай калегіі.
Таксама Лабовіч дадаў, што ягонае ведамства вядзе працу з 18 рэсурсаў.
У пэрспэктыве афармленьне дапамог, пэнсій і выплатаў па часовай непрацаздольнасьці стане прасьцей і хутчэй: частка зьвестак ужо будзе захоўвацца, а колькасьць даведак скароціцца.
У міністэрстве зазначаюць, што лічбавізацыя такіх працэсаў павінна павысіць зручнасьць для будучых мамаў і маладых сем’яў, а таксама зьнізіць адміністрацыйную нагрузку на ўстановы сацыяльнай сфэры. Аднак магчымасьці разьвіцьця такога віду афармленьня і захаваньня дакумэнтацыі стануць вядомыя толькі пасьля праведзенага экспэрымэнту.
ГЛЯДЗІЦЕ ТАКСАМА: Дзіцячыя дамы, крэдыты, абавязковы «дэкрэтны» адпачынак для бацькі. Што дзяржава можа прапанаваць беларускам замест абортаў