У афіцыйных мерапрыемствах у Вільні ўзяў удзел дарадца Сьвятланы Ціханоўскай у парлямэнцкім супрацоўніцтве Анатоль Лябедзька, а Аляксандар Лукашэнка павіншаваў з гэтым сьвятам літоўскі народ.
«Літва за гэты час прадэманстравала, што можа зрабіць краіна і народ, якія вераць у сябе і імкнуцца да будучыні. Я магу толькі далучыцца да віншаваньняў, якія гучалі з вуснаў прэзыдэнта Наўседы і прэзыдэнткі Эўрапейскага парлямэнту. Я веру, што ў нас будзе супольная эўрапейская будучыня. Мы будзем жыць побач у „Эўрапейскім квартале“», — сказаў Анатоль Лябедзька.
Паводле яго, для беларусаў важна быць побач зь Літвой у такія сымбалічныя даты і падзяляць каштоўнасьці свабоды, дзяржаўнасьці і эўрапейскай будучыні.
Аляксандар Лукашэнка прадоўжыў сваю практыку віншаваньняў зь дзяржаўнымі сьвятамі краін, якія ўлады Беларусі ўключылі ў сьпіс «недружалюбных», толькі зьвяртаючыся да іх народаў.
«Стагодзьдзямі мы мелі добразычлівыя дачыненьні, заснаваныя на гістарычных сувязях, агульных духоўных каштоўнасьцях, узаемным культурным узбагачэньні. І сёньня, нягледзячы на існыя цяжкасьці і выпрабаваньні, беларусы захавалі шчырыя сымпатыі да літоўцаў», — адзначыў Лукашэнка.
Ён выкарыстаў гэта сьвята ў Літве, каб зноў абвінаваціць улады краіны ў «недальнабачнасьці» датычна Беларусі, палітыка якіх, паводле яго, «ніколі не супадала з сапраўднымі інтарэсамі літоўскага народу».
Лукашэнка заявіў, што «Беларусь зацікаўлена ў канструктыўным разьвіцьці двухбаковых дачыненьняў на здаровай аснове з апорай на прынцыпы партнэрства і даверу, дружалюбнасьці і павагі».
ГЛЯДЗІЦЕ ТАКСАМА: Рыжанкоў напісаў другі публічны ліст да літоўскага народу, але перамовы зноў прапануе ўладам