Напярэдадні Аляксандар Лукашэнка абурыўся тым, што дзяржава нібыта выдатковае велізарныя грошы на вулічнае асьвятленьне. У прыватнасьці, ён запатрабаваў уключаць асьвятленьне толькі, а 20-й гадзіне, а выключаць, а 7-й раніцы.
Незадаволенасьць Лукашэнкі выклікала тое, што ў Менскай вобласьці «ўсё сьвеціцца», а вулічнае асьвятленьне падключаецца ўжо, а 18-й гадзіне. Чыноўнікі сказалі, што быццам некарэктна працуюць фотаэлемэнты, што адказваюць за ўключэньне ліхтароў. Тады Лукашэнка запатрабаваў адрэгуляваць іх да такой ступені, каб асьвятленьне ўключалася не раней за 20-ю гадзіну.
Пасьля крытыкі Лукашэнкі ў вобласьцях правялі тэрміновыя нарады ў пытаньні асьвятленьня вуліц.
Пры гэтым у Дзяржаўнай аўтаінспэкцыі раней нагадвалі, што найбольш небясьпечны для стварэньня аварыйных становішчаў на дарогах час — зьмярканьне і сьвітанак. Беларусь знаходзіцца ў такім геаграфічным становішчы, што ў зімовы пэрыяд у краіне вельмі рана наступае цемра і агулам сьветлавы дзень меншы за цёмны час содняў.
Як раней заяўлялі ў «Менскэнэрга», у Менскай вобласьці ўдзельная вага асьветленых вуліц у буйных населеных пунктах павінна складаць ня менш як 80%, тады як для малых вёсак і пасёлкаў дапушчальна ўсяго два вулічныя ліхтары — на ўезьдзе і выезьдзе.
ГЛЯДЗІЦЕ ТАКСАМА: У Беларусі перанесьлі падвышэньне камунальных паслуг на сакавік